*2 மணி நேரம் போக்குவரத்து பாதிப்பு
போளூர் : போளூர் அருகே கிராம மக்கள் திடீர் சாலை மறியலில் ஈடுபட்டதால் 2 மணி நேரம் போக்குவரத்து பாதிப்பு ஏற்பட்டது.திருவண்ணாமலை மாவட்டம், போளூர் அருகே உள்ள எட்டிவாடி கிராமத்தில் சுமார் 5 ஆயிரத்திற்கும் மேற்பட்ட மக்கள் வசித்து வருகின்றனர்.
இவர்கள் அங்குள்ள கூட்ரோடில் இறங்கி தான் ஊருக்குள் செல்ல வேண்டும். மேலும், வேலூர், திருவண்ணாமலை, ஆரணி, போளூர் உள்ளிட்ட நகரங்களுக்கு பள்ளி மாணவர்கள், வேலைக்கு செல்பவர்கள், அரசு மருத்துவமனைக்கு செல்பவர்கள், வியாபாரத்திற்கு பொருட்கள் வாங்கி வருபவர்கள் என பல்வேறு தேவைகளுக்காக நாள்தோறும் சென்று வருகின்றனர். இதற்காக எட்டிவாடி கூட்ரோடில் பஸ்சுக்காக காத்திருக்க வேண்டி உள்ளது.
இந்நிலையில், வேலூர் பஸ் நிலையத்தில் இருந்து திருவண்ணாமலைக்கு செல்லும் தனியார் பஸ்கள் எட்டிவாடி கூட்ரோடு என்றால் ஏற்றாமல் புறக்கணித்து வருவதாக கூறப்படுகிறது.
இதனால் கிராம மக்கள் கடும் அவதிக்குள்ளாகி வருகின்றனர். இதைத்தொடர்ந்து, நேற்று கிராம மக்கள் 500க்கும் மேற்பட்டோர் ஒன்று திரண்டு வேலூர்- திருவண்ணாமலை சாலை எட்டிவாடி கூட்ரோட்டில் திடீர் மறியலில் ஈடுபட்டனர். இதனால் அங்கு பரபரப்பு ஏற்பட்டது.
இதுகுறித்து தகவலறிந்த களம்பூர் போலீசார், ஆரணி இன்ஸ்பெக்டர் விநாயகமூர்த்தி, சப்- இன்ஸ்பெக்டர் குபேந்திரன், ஏழுமலை, ஷாபுதீன், போளூர் போக்குவரத்து கிளை மேலாளர் சீனுவாசன், ஆரணி வட்டார போக்குவரத்து மேலாளர் முருகேசன் சம்பவ இடத்திற்கு விரைந்து வந்து மறியலில் ஈடுபட்டவர்களிடம் பேச்சுவார்த்தை நடத்தினர்.
அப்போது கிராம மக்கள், வேலூர் பஸ் நிலையத்தில் இருந்து புறப்படும் பஸ்களில் எங்கள் கிராம மக்களை ஏற்றுவதில்லை. இதனால் மிகவும் பாதிக்கப்பட்டு உள்ளோம். அதேபோல், அரசு பஸ்கள், ஆரணி பஸ்கள் எட்டிவாடி கூட்ரோட்டில் நின்று செல்கிறது. ஆனால் தனியார் பஸ்கள் எதுவும் நிற்பதில்லை. எனவே, வேலூரில் இருந்து திருவண்ணாமலைக்கு செல்லும் அனைத்து பஸ்களும் எட்டிவாடி கூட்ரோடில் நின்று செல்ல நடவடிக்கை எடுக்க வேண்டும் என்றனர்.
அதற்கு போலீசார் மற்றும் அதிகாரிகள், உரிய நடவடிக்கை எடுக்கப்படும் என கூறியதால் கிராம மக்கள் சாலை மறியலை கைவிட்டு கலைந்து சென்றனர். மறியல் காரணமாக ஒரு கிலோ மீட்டர் தூரம் பஸ்கள் நின்றதால் 2 மணி நேரம் போக்குவரத்து பாதிப்பு ஏற்பட்டது குறிப்பிடத்தக்கது.
The post போளூர் அடுத்த எட்டிவாடி கூட்ரோட்டில் தனியார் பஸ்கள் நின்று செல்ல வலியுறுத்தி மக்கள் சாலை மறியல் appeared first on Dinakaran.