சென்னை: தினம், தினம் புதிய உச்சத்தை தொட்டு வந்த நிலையில், நேற்று தங்கம் விலை திடீரென சவரனுக்கு ரூ.560 குறைந்தது. தங்கம் விலை கடந்த சில மாதங்களாக ஏற்றம், இறக்கத்துடன் காணப்பட்டு வந்தது. இதற்கிடையில் தீபாவளி பண்டிகை நேரத்தில் யாரும் எதிர்பார்க்காத வகையில் தங்கம் விலை அதிரடியாக சரிவை சந்தித்தது. அதன் பிறகு தங்கம் விலை ஜெட் வேகத்தில் அதிகரிக்க தொடங்கியது. கடந்த மாதம் 29ம் தேதி ஒரு சவரன் தங்கம் ரூ.46,960க்கு விற்பனையானது. இது தங்கம் விலை வரலாற்றில் அதிகபட்ச விலை என்ற சாதனையை படைத்தது. அதன் பிறகு கடந்த 2ம் தேதி தங்கம் விலை சவரன் ரூ.47,320 என்றும், 4ம் தேதி சவரன் ரூ.47,800 என்றும் அடுத்தடுத்து புதிய உச்சம் கண்டு வரலாற்று சாதனையை படைத்தது. அதன் பிறகு தங்கம் விலை ஏறுவதும் இறங்குவதுமாக இருந்து வருகிறது.

இந்த நிலையில் நேற்று முன்தினம் ஒரு கிராம் தங்கம் ரூ.5,835க்கும், சவரன் ரூ.46,680க்கும் விற்கப்பட்டது. நேற்று தங்கம் விலை யாரும் எதிர்பார்க்காத வகையில் அதிரடியாக சரிவை சந்தித்தது. அதாவது நேற்று மட்டும் தங்கம் விலை கிராமுக்கு ரூ.70 குறைந்து ஒரு கிராம் ரூ.5,765க்கும், சவரனுக்கு ரூ.560 குறைந்து ஒரு சவரன் ரூ.46,120க்கும் விற்கப்பட்டது. இந்த விலை குறைவு நகை வாங்குவோருக்கு சற்று மகிழ்ச்சியை ஏற்படுத்தியுள்ளது. இன்று ஞாயிற்றுக்கிழமை என்பதால் தங்கம் மார்க்கெட்டுக்கு விடுமுறை. அதனால், நேற்றைய விலையிலேயே இன்று தங்கம் விற்பனையாகும்.

 

The post தினந்தினம் புதிய உச்சத்தை தொட்ட நிலையில் தங்கம் விலை திடீர் சரிவு: ஒரே நாளில் சவரனுக்கு ரூ.560 குறைந்தது appeared first on Dinakaran.