நன்றி குங்குமம் டாக்டர்

சிவப்பு திராட்சை உடலுக்கு மிகவும் நன்மை பயக்கும் ஊட்டச்சத்துக்கள் மற்றும் ஆன்டிஆக்ஸிடன்ட்கள் நிறைந்த ஒரு பழமாகும். இது இதய ஆரோக்கியத்தை மேம்படுத்துதல், நோய் எதிர்ப்புச் சக்தியை அதிகரித்தல், மூளையின் செயல்பாட்டை மேம்படுத்துதல் மற்றும் சருமத்தை இளமையாகப் பராமரித்தல் போன்ற பல நன்மைகளை வழங்குகிறது.

சிவப்பு திராட்சையில் வைட்டமின் ஏ, சி, டி, கால்சியம், பாஸ்பரஸ், ஃபோலேட், மக்னீசியம் மற்றும் செலினியம் உள்ளன. பிளேவனாய்டுகளும் அதிகம் உள்ளன. கண் ஆரோக்கியத்திற்கும், தோல் ஆரோக்கியத்திற்கும் சிவப்பு திராட்சை நன்மை செய்கிறது. சிவப்பு திராட்சை சிறந்த ஆக்சிஜனேற்றி. இதில் நார்ச்சத்து உள்ளது. இதன் தோல் மற்றும் விதைகளில் வயதாவதை கட்டுப்படுத்தக்கூடிய ரெஸ்வெராட்ரோல் எனும் வேதிப் பொருள் உள்ளது. இது சரும ஆரோக்கியத்துக்கு நன்மை பயக்கிறது.

சிவப்பு திராட்சையின் முக்கிய நன்மைகள்

இதய ஆரோக்கியம்: இதில் உள்ள ரெஸ்வெராட்ரோல் (Resveratrol) மற்றும் ஃபிளாவனாய்டுகள் ரத்த அழுத்தத்தைக் கட்டுப்படுத்தவும், ரத்த நாளங்களை ஆரோக்கியமாக வைத்துக்கொள்ளவும்
உதவுகின்றன. புற்றுநோய் எதிர்ப்பு: சிவப்பு திராட்சையின் தோலில் உள்ள ஆன்டிஆக்ஸிடன்ட்கள் உடலில் ஏற்படும் வீக்கத்தைக் குறைத்து, புற்றுநோய் செல்களின் வளர்ச்சியைத் தடுக்க உதவுகின்றன.

சரும ஆரோக்கியம்: வைட்டமின் சி மற்றும் ஆன்டிஆக்ஸிடன்ட்கள் நிறைந்துள்ளதால், இது சருமத்தில் ஏற்படும் சுருக்கங்களைத் தடுத்து, இளமையான தோற்றத்தைத் தருகிறது.

மூளை செயல்பாடு: ரெஸ்வெராட்ரோல் மூளைக்குச் செல்லும் ரத்த ஓட்டத்தை அதிகரிக்கிறது. இது அல்சைமர் (Alzheimer’s) போன்ற நரம்பியல் நோய்களிலிருந்து பாதுகாக்கவும் உதவுகிறது.
நோய் எதிர்ப்பு சக்தி: வைட்டமின் சி மற்றும் பிற ஃபிளாவனாய்டுகள் நோய் எதிர்ப்பு மண்டலத்தை வலுப்படுத்தி, வைரஸ் மற்றும் பாக்டீரியா தொற்றுகளை எதிர்த்துப் போராட
உதவுகின்றன.

கண் ஆரோக்கியம்: இதில் உள்ள லுடீன் (Lutein) மற்றும் ஜியாக்சாந்தின் (Zeaxanthin) போன்ற கூறுகள் கண் பார்வையை மேம்படுத்தி, விழித்திரை தொடர்பான பிரச்னை களைத் தடுக்கின்றன.

மலச்சிக்கல் தீர்வு: சிவப்பு திராட்சையில் உள்ள நார்ச்சத்து மற்றும் நீர்ச்சத்து செரிமானத்தை மேம்படுத்தி, மலச்சிக்கல் பிரச்னையைத் தீர்க்க உதவுகிறது. நுரையீரல் ஈரப்பதத்தை அதிகம் ஆக்கி, ஆஸ்துமா நோய்க்கு சிறந்த மருந்தாகிறது. சிவப்பு திராட்சையின் முழுப் பலன்களையும் பெற, பழங்களை நன்கு சுத்தம் செய்து தோலுடன் உண்பது நல்லது.

தொகுப்பு:- மகாலட்சுமி சுப்ரமணியன்