மம்தாவை தோற்கடிக்க குறுக்குவழி உள்ளது: அமித்ஷா சொல்கிறார்

மேற்கு வங்கம் மாநிலம், பவானிபூர் தொகுதியில் முதல்வர் மம்தாவை எதிர்த்து, பாஜ சார்பில் சட்டப்பேரவை எதிர்க்கட்சி தலைவர் சுவேந்து அதிகாரி போட்டியிடுகிறார். அவர் நேற்று உள்துறை அமைச்சர் அமித்ஷா முன்னிலையில் மனுத்தாக்கல் செய்தார். முன்னதாக அமித்ஷா கூறியதாவது: மேற்குவங்கத்தில் மாற்றத்தை கொண்டு வர ஒரு குறுக்குவழி என்னிடம் உள்ளது. அந்த குறுக்குவழி என்னவென்றால், முதல்வர் மம்தா பானர்ஜியை அவரது சொந்தத் தொகுதியான பவானிபூரிலேயே தோற்கடிப்பதே ஆகும்.

மேற்குவங்கத்தில் பெரும்பான்மையுடன் ஆட்சி அமைக்க பாஜ வழக்கமாக 170 தொகுதிகளில் வெற்றி பெற வேண்டும். ஆனால் பவானிபூரில் பாஜ வேட்பாளர் சுவேந்து அதிகாரி பெறும் வெற்றி மட்டுமே மேற்குவங்க அரசியலில் தானாகவே மாற்றத்தைக் கொண்டுவரும். மேற்கு வங்கத்தில் மாற்றம் நிச்சயம் நிகழும். மேற்குவங்கம் முழுவதின் விடுதலைக்காக, நமது வேட்பாளர் சுவேந்து அதிகாரிக்கு மாபெரும் வெற்றியை உறுதி செய்யுமாறு, கைகூப்பி வணங்கி பவானிபூர் மக்களிடம் நான் வேண்டுகோள் விடுக்கிறேன். சுவேந்து அதிகாரி, நந்திகிராமத்தில் போட்டியிட விரும்பினார்.

ஆனால் நான் அவரிடம், நந்திகிராமம் மட்டும் போதாது. நீங்கள் மம்தா பானர்ஜியின் சொந்த தொகுதிக்கே சென்று, அங்கேயே அவரைத் தோற்கடிக்க வேண்டும் என்று கூறினேன். ஏனெனில் 2021 தேர்தல் முடிந்த பிறகு இங்கு மம்தா ஆட்சி அமைத்திருக்கலாம்.ஆனால் நந்திகிராமத்தில் சுவேந்து அதிகாரியிடம் அவர் தோல்வியடைந்தார். இம்முறை அவர் மாநிலம் முழுவதும் மட்டுமல்லாமல், பவானிபூரிலும் தோல்வியடைவார்.

மேற்கு வங்கத்திற்கு மாற்றம் தேவை. மோடியின் தலைமையில் இங்கு ஒரு பாஜ ஆட்சி அமைய வேண்டும். வங்காளத்தின் எல்லைகள் முழுமையாக அடைக்கப்பட வேண்டும். ஊடுருவல்காரர்கள் அடையாளம் காணப்பட்டு, மாநிலத்திலிருந்தும் நாட்டிலிருந்தும் வெளியேற்றப்பட வேண்டும். ஊடுருவலின் அளவு எந்தளவுக்கு அதிகரித்துள்ளது என்றால், மேற்குவங்க மாநிலத்தின் இருப்பே இன்று கேள்விக்குறியாகியுள்ளது.

தேர்தல் பிரச்சாரத்தின் போது மேற்கு வங்கத்தில் 15 நாட்கள் தங்கியிருக்கப்போகிறேன். அப்போது உங்களுடன் உரையாட எனக்குப் பல வாய்ப்புகள் கிடைக்கும். இன்று, எங்கள் வேட்பாளர்கள் சுவேந்து அதிகாரி தனது வேட்புமனுக்களைத் தாக்கல் செய்வதற்காக நான் இங்கு வந்துள்ளேன். எனவே இந்தத் தேர்தல் என்பது வெறும் ஆட்சி மாற்றத்திற்கானதாக மட்டுமல்லாமல், மேற்குவங்கத்தை விடுவிப்பதற்கான தேர்தலாகவே அமைந்துள்ளது. இவ்வாறு பேசினார்.