டெல்லி: மக்களவை எதிர்க்கட்சித் தலைவர் ராகுல் காந்தி, இன்று நாடாளுமன்றத்தில் தனது உரையைத் தொடங்கும்போது, 2020-ம் ஆண்டில் இந்தியாவுக்கும் சீனாவுக்கும் இடையே லடாக் எல்லையில் ஏற்பட்ட மோதல் குறித்து முன்னாள் ராணுவத் தளபதி ஜெனரல் எம்.எம். நரவனே எழுதிய வெளியிடப்படாத புத்தகம் குறித்த ஒரு பத்திரிகைக் கட்டுரையை கையில் ஏந்தியபடி பேசத் தொடங்கினார். இது பாஜக தலைவர்களுக்கு அதிருப்தியை ஏற்படுத்தியது.
ராகுல் காந்தி அந்தப் புத்தகத்திலிருந்து மேற்கோள் காட்டத் தொடங்கிய உடனேயே, பாதுகாப்புத் துறை அமைச்சர் ராஜ்நாத் சிங் குறுக்கிட்டு, வெளியிடப்படாத புத்தகத்திலிருந்து மேற்கோள் காட்டுவது சபையின் விதிகளுக்கு எதிரானது என்று கூறி அதற்கு எதிர்ப்பு தெரிவித்தார்.
2020-ம் ஆண்டு மே 5-ம் தேதி பாங்காங் ஏரி பகுதியில் இந்திய மற்றும் சீன வீரர்களுக்கு இடையே ஏற்பட்ட வன்முறை மோதலைத் தொடர்ந்து, கிழக்கு லடாக் எல்லையில் பதற்றம் வெடித்தது. முன்னாள் ராணுவத் தளபதி ஜெனரல் நரவனே, ‘ஃபோர் ஸ்டார்ஸ் ஆஃப் டெஸ்டினி’ என்ற தனது வெளியிடப்படாத சுயசரிதையில் இந்த மோதல் குறித்து எழுதியுள்ளார். அந்தப் புத்தகம் குறித்த ஒரு கட்டுரை ஒரு பிரபலமான பத்திரிகையில் வெளியிடப்பட்டுள்ளது. அந்தப் பத்திரிகையின் அச்சுப் பிரதியை கையில் வைத்திருந்த ராகுல் காந்தி, அந்தப் புத்தகம் குறித்து மீண்டும் மீண்டும் பேச முயன்றார். ஆனால், பாதுகாப்புத் துறை அமைச்சர் மட்டுமல்லாமல், உள்துறை அமைச்சர் அமித் ஷா மற்றும் நாடாளுமன்ற விவகாரங்கள் துறை அமைச்சர் கிரண் ரிஜிஜு ஆகியோர் கடுமையாக எதிர்த்தனர்.
மக்களவை எதிர்க்கட்சித் தலைவர், அவர் மேற்கோள் காட்டும் புத்தகத்தை சபையில் சமர்ப்பிக்க வேண்டும் என்று நான் விரும்புகிறேன். ஏனென்றால், அவர் குறிப்பிடும் புத்தகம் இன்னும் வெளியிடப்படவில்லை என பாதுகாப்புத்துறை அமைச்சர் ராஜ்நாத் சிங் கூறினார்.
எதிர்க்கட்சித் தலைவருக்கு ஆதரவாக சமாஜ்வாடி கட்சித் தலைவர் அகிலேஷ் யாதவ் பேசினார்.
‘சீன ஆக்கிரமிப்பு பற்றி ராகுல் பேசும்போது ஏன் எதிர்கிறீர்கள்..? சீனாவின் ஆக்கிரமிப்பு என்பது மிகவும் முக்கியமான பிரச்சனை. முக்கிய பிரச்சனை என்றால் அதனை அவையில் எழுப்புவதற்கு எதிர்கட்சி தலைவருக்கு உரிமை உண்டு மக்களவை எதிர்க்கட்சித் தலைவர் பேச அனுமதிக்கப்பட வேண்டும்,’ என்று அவர் கூறினார்.
“அந்தப் புத்தகம் இன்னும் வெளியிடப்படாதபோது, அதிலிருந்து அவர் எப்படி மேற்கோள் காட்ட முடியும்?” என்று உள்துறை அமைச்சர் அமித் ஷா கேட்டார்.
“மக்களவையில் சபாநாயகரின் உத்தரவை மதிக்காத உறுப்பினர் மீது என்ன நடவடிக்கை எடுக்க வேண்டும் என்பது குறித்தும் நாம் விவாதிக்க வேண்டும்,” என கிரண் ரிஜிஜு பரிந்துரைத்தார்.
மீண்டும் மீண்டும் ஏற்பட்ட குறுக்கீடுகளால், ராகுல் காந்தி, “அதில் அப்படி என்ன இருக்கிறது, அது இவர்களை இவ்வளவு பயமுறுத்துகிறது? அவர்களுக்குப் பயம் இல்லையென்றால், நான் தொடர்ந்து படிக்க அனுமதிக்கப்பட வேண்டும். தான் மேற்கோள் காட்டிய கட்டுரையும் புத்தகமும் “100% உண்மையானவை” என்று ராகுல்காந்தி கூறினார்.
