திமுக பொதுச்செயலாளர் க.அன்பழகன் உடல்நலக்குறைவு காரணமாக மருத்துவமனையில் அனுமதிக்கப்பட்டுள்ளார். அவரை மு.க.ஸ்டாலின் நேரில் சந்தித்து நலம் விசாரித்தார். திமுக பொதுச்செயலாளர் க.அன்பழகன் (95) வயது மூப்பின் காரணமாக சமீப காலமாக கட்சியின் முக்கிய கூட்டங்களை தவிர மற்ற நிகழ்ச்சிகளில் கலந்து கொள்வதை தவிர்த்து வந்தார். இந்த நிலையில், அவருக்கு நேற்று முன்தினம் இரவு 11 மணியளவில் திடீரென உடல் நலக்குறைவு ஏற்பட்டது. இதையடுத்து சென்னை ஆயிரம் விளக்கு கிரீம்ஸ் சாலையில் உள்ள அப்போலோ மருத்துவமனையில் சிகிச்சைக்காக அனுமதிக்கப்பட்டார். அங்கு அவருக்கு டாக்டர்கள் சிகிச்சை அளித்து வருகின்றனர். இது குறித்த தகவல் அறிந்ததும் திமுக தலைவர் மு.க.ஸ்டாலின் அன்று இரவே மருத்துவமனைக்கு நேரில் சென்று அவரது உடல் நிலை குறித்து கேட்டறிந்தார்.