தென்னிந்திய படவுலகை தொடர்ந்து இந்தியிலும் திரைப்படங்கள், விளம்பரங்கள், வெப்தொடர்கள், இசை ஆல்பங்களில் நடித்து கோடிக்கணக்கில் பணம் சம்பாதிப்பவர், ரகுல் பிரீத் சிங். அவர் தனது சோஷியல் மீடியாக்களின் விளம்பரங்களின் மூலம் லட்சக்கணக்கில் பணம் சம்பாதிக்கிறார். மேலும், உடற்பயிற்சிக்கு அதிக முக்கியத்துவம் கொடுக்கிறார். கடந்த 2024ம் ஆண்டு இறுதியில் ஜிம்மில் 80 கிலோ எடையை தூக்கும்போது முதுகில் பலத்த காயம் அடைந்தார். இதற்காக தீவிர சிகிச்சை பெற்று வந்தார். இந்நிலையில், 18 மாதங்களுக்கு பிறகு மீண்டும் உடற்பயிற்சியை தொடங்கியுள்ளார். இதுகுறித்து கூறுகையில், ‘ஒவ்வொரு பயணத்திலும் யாரும் எதிர்பார்க்காத ஒரு அத்தியாயம் இருக்கும். எனக்கு அது ஒரு காயத்தின் வடிவில் வந்தது.
ஒவ்வொரு நாளும் இன்னும் வலிமையாக மாற வேண்டும் என்ற இலக்குடன் இருந்தபோது, அந்த காயம் எனது பயணத்தை திடீரென்று தடுத்து நிறுத்திவிட்டது. அது எனக்கு ஏராளமான பாடங்களை கற்றுக்கொடுத்தது. குறிப்பாக, பொறுமையையே அதிகமாக கற்றுக்கொடுத்தது. முன்பு புதிய உடற்பயிற்சி இலக்குகளை அடைய வேண்டும் என்பதில் எனது கவனம் இருந்தது. ஆனால், இந்த காயத்துக்கு பிறகு நல்ல உடல்நிலையை மீண்டும் பெறுவதுதான் முக்கியம் என்பதை உணர்ந்தேன். ஜிம்முக்குள் மீண்டும் நுழைந்தது, நீண்ட நாட்களுக்கு பிறகு எனது வீட்டுக்கு திரும்பியதை போன்ற உணர்வை கொடுத்தது. நான் பழைய மனுஷியாக திரும்பி வரவில்லை. மனவலிமை, நன்றியுணர்வு மற்றும் புதிய பார்வையுடன் புதிய அத்தியாயத்தை தொடங்க வந்திருக்கிறேன்’ என்றார்.