கூகுளின் வருகை விசாகப்பட்டினத்திற்கு மட்டுமல்ல ஆந்திர மாநிலத்திற்கே ஒரு திருப்புமுனையாகும்

*அடிக்கல் நாட்டு விழாவில் முதல்வர் பேச்சு

திருமலை : விசாகப்பட்டினத்தில் கூகுள் ஏஐ தரவு மையம் அமைக்க முதல்வர் சந்திரபாபு நாயுடு அடிக்கல் நாட்டி தொடங்கி வைத்தார்.ஆந்திர மாநிலம் விசாகப்பட்டினம் தார்லுவாடாவில் கூகுள் ஏஐ தரவு மையம் அமைப்பதற்கான அடிக்கல் நாட்டு விழா நேற்று நடந்தது. இந்த விழாவிற்கு சிறப்பு விருந்தினராக முதல்வர் சந்திரபாபு நாயுடு பங்கேற்று கூகுள் தரவு மையம் அமைப்பதற்கு அடிக்கல் நாட்டி வைத்தார். தொடர்ந்து அவர் பேசியதாவது:

ஆந்திர மாநில வரலாற்றில் மறக்க முடியாத நாள் இன்று. கூகுளின் வருகை விசாகப்பட்டினத்திற்கு மட்டுமல்ல ஆந்திர மாநிலத்திற்கே ஒரு திருப்புமுனையாகும். கூகுள் ஏஐ தரவு மையம் ஆந்திர மாநில தொழில்நுட்பத்திற்கும் நாட்டிற்கும் ஒரு வளர்ச்சி இயந்திரமாக மாறும்.துர்லவாடாவின் பெயர் எதிர்காலத்தில் ஒரு தொழில்நுட்ப மையமாக நினைவுகூறப்படும்.

தொழில்நுட்பத்தில் ஆந்திர மாநிலம் பெருமையுடன் நிற்கும். ஆந்திர மாநிலம் எப்போதும் புதிய கண்டுபிடிப்புகளை வரவேற்கும். செயற்கை நுண்ணறிவுத் தரவு மையம் ஒரு ஜிகாவாட் திறனுடன் செயல்படும். ஆந்திர மாநிலம் இந்தியாவிற்கான ஒரு சர்வதேச தரவு நுழைவாயிலாகத் திகழும்.

ஒரு தேடுபொறியாகத் தொடங்கிய கூகுள் இப்போது இந்தியாவின் வளர்ச்சி இயந்திரமாக மாறப்போகிறது. முக்கிய நிறுவனங்கள் விசாகப்பட்டினத்தில் முதலீடு செய்வது ஒரு நல்ல முன்னேற்றமாகும்.

கூகுளின் கண்டுபிடிப்புகளும் ஆந்திர மாநிலத்தின் வணிகம் செய்யும் வேகமும் ஒன்றிணைகின்றன. ஜூலை மாதம் போகபுரம் விமான நிலையத்தை நாட்டுக்கு அர்ப்பணிப்போம். எதிர்காலத்தில், அனகாபள்ளி மாவட்டம் மற்றொரு ரங்க ரெட்டி மாவட்டமாக மாறும் மற்ற நகரங்களை விட தொழில் செய்வதற்கான செலவு மிகவும் குறைவாக இருக்கும்.இவ்வாறு அவர் பேசினார்.

இதனை தொடர்ந்து ஒன்றிய ரயில்வே அமைச்சர் அஸ்வினி வைஷ்ணவ் பேசியதாவது:விசாகப்பட்டினத்திற்கு கூகுள் போன்ற பெரிய நிறுவனங்களின் வருகை ஒரு நல்ல முன்னேற்றம். மத்திய அரசிடமிருந்து எந்தத் தாமதமும் இல்லை. மாறிவரும் காலங்களில் மின்னணு உற்பத்தி மிகவும் முக்கியத்துவம் வாய்ந்ததாகி விட்டது. உலகம் இப்போது இந்தியாவை ஒரு மின்னணு உற்பத்தி மையமாக அங்கீகரித்து வருகிறது. மின்னணு விநியோகச் சங்கிலியில் இந்தியா இப்போது ஒரு முக்கியப் பங்கு வகிக்கிறது.

குறைக்கடத்தி உற்பத்தி உலகில் ஒரு முக்கியப் பங்கை வகிக்கிறது. ஒரு டாலர் மதிப்புள்ள சிப் கண்டுபிடிக்கப்படாவிட்டால் பல மில்லியன் டாலர் மதிப்புள்ள உற்பத்தி நின்றுவிடும். ஆனால் இரட்டை என்ஜின் அரசாங்கத்தின் கீழ் ஆந்திர மாநிலத்திற்கான ரயில்வே நிதி பெருமளவில் அதிகரித்துள்ளது. முன்னதாக ஒருங்கிணைந்த ஆந்திர மாநிலத்தில் ரூ.800கோடி ரயில்வே நிதி மட்டுமே பெறப்பட்டது.

இப்போது ஆந்திர மாநிலம் மட்டும் ரூ.10 ஆயிரம் கோடிக்கும் அதிகமான நிதியைப் பெறுகிறது. தற்போது, ஆந்திர மாநிலத்தில் லட்சக்கணக்கான கோடி ரூபாய் மதிப்புள்ள ரயில்வே திட்டங்கள் உள்ளன. ஆந்திர மாநிலத்தில் ரயில்வே நெட்வொர்க்கின் 100 சதவீதம் மின்மயமாக்கல் நிறைவடைந்துள்ளது. தென்கடற்கரை ரயில்வே மண்டலம் ஜூன் 1 ஆம் தேதி தொடங்கும் என்றார்.

தென் இந்தியாவுக்கு புல்லட் ரயில்

விழாவில் ஒன்றிய ரயில்வே அமைச்சர் அஸ்வினி வைஷ்ணவ் பேசுகையில், ‘அமராவதி, ஐதராபாத், சென்னை மற்றும் பெங்களூரு இடையேயான இணைப்பு அதிகரிக்கப் போகிறது. புல்லட் ரயில்கள் தென்னிந்தியாவிற்கான எங்கள் அர்ப்பணிப்புக்கு ஒரு சான்றாகும்.

ரயில்வே, நெடுஞ்சாலைகள் மின்சாரம் மற்றும் துறைமுகங்கள் போன்ற அனைத்துத் துறைகளிலும் தென்னிந்தியாவிற்கு மிகப்பெரிய முதலீடுகள் வரவிருக்கின்றன. அமராவதியிலிருந்து ஐதராபாத்துக்கு ஒரு புல்லட் ரயில் வரப்போகிறது. நீங்கள் அமராவதியிலிருந்து ஐதராபாத்துக்கு வெறும் 70 நிமிடங்களில் செல்லலாம் என்று குறிப்பிட்டார்.