சென்னை: ‘மாற்றம் என்று தவெகவினர் கூறியது பெயர் மாற்றம் தான் போல’ என அரசு பேருந்துகளில் ‘விடியல்’ பெயர் நீக்கப்பட்டதற்கு முன்னாள் அமைச்சர் கீதா ஜீவன் கண்டனம் தெரிவித்துள்ளார். இதுகுறித்து மேலும் அவர் வெளியிட்டுள்ள அறிக்கையில்;

“திமுக அரசு கொண்டு வந்த ‘மகளிர் விடியல் பயணம்’ திட்டத்தை ‘மகளிர் பயணம்’ எனப் பெயர் மாற்றியிருக்கிறது தவெக அரசு.

அதிமுக-வின் 10 ஆண்டுகால ஆட்சியால் இருண்டு கிடந்த தமிழ்நாட்டுக்கு விடியலை கொடுத்தது நமது திமுக அரசு. தற்போதைய தவெக அரசு, மீண்டும் தமிழ்நாட்டை இருண்ட காலமாக மாற்றப் போவதால் ‘விடியல்’ என்ற சொல்லை அவர்களாகவே நீக்கியிருக்கிறார்கள் போல..!

மகளிர் விடியல் பயணத்தில் விடியலை தூக்கியவர்கள், வரும் நாட்களில் ‘மகளிர் பயணம்’ என்ற சொற்களையும் தூக்கிவிட்டு இத்திட்டத்தையே நிறுத்திவிடுவார்களோ என்ற அச்சம் பெண்களிடையே மேலோங்குகிறது!

மாற்றம் என்று தவெகவினர் கூறியது பெயர் மாற்றம் தான் போல!” என தெரிவித்துள்ளார்.