ஐஏஎஸ், ஐபிஎஸ், ஐஆர்எஸ் பதவி இறுதி தேர்வு முடிவு இந்திய அளவில் 759 பேர் தேர்ச்சி: தமிழகத்தில் 39 பேர் வெற்றி பெற்று சாதனை,..ரிஷாப் முதல் இடத்தை பிடித்தார்

சென்னை: ஐஏஎஸ், ஐபிஎஸ், ஐஆர்எஸ் உள்ளிட்ட சிவில் சர்விஸ் தேர்வுக்கான இறுதி முடிவு நேற்று வெளியிடப்பட்டுள்ளது. இதில் தமிழகத்தில் 39 பேர் வெற்றி பெற்று சாதனை படைத்துள்ளனர்.மத்திய அரசு பணியாளர் தேர்வாணையம் (யு.பி.எஸ்.சி.) ஐ.ஏ.எஸ்., ஐ.பி.எஸ்., ஐ.ஆர்.எஸ். உள்ளிட்ட 26 பணிகளுக்கான சிவில் சர்வீஸ் தேர்வை மத்திய அரசு பணியாளர் தேர்வாணையம்(யு.பி.எஸ்.சி.) ஒவ்வொரு ஆண்டும் நடத்தி வருகிறது. இந்த நிலையில் 2018ம் ஆண்டுக்கான 812 பணியிடங்களை நிரப்புவதற்கான அறிவிப்பை யு.பி.எஸ்.சி. கடந்த ஆண்டு அறிவித்தது. இதற்கான முதல்நிலை தேர்வு கடந்த ஆண்டு ஜூன் 3ம் தேதி நடந்தது. இத்தேர்வை நாடு முழுவதும் சுமார் 6.25 பேர் லட்சம் எழுதினர். இதில் தேர்ச்சி பெற்றோருக்கு முதன்மை தேர்வு செப்டம்பர் 28ம் தேதி முதல் அக்டோபர் 10ம் தேதி வரை நடந்தது.

தொடர்ந்து நேர்முக தேர்வு கடந்த பிப்ரவரி 11ம் தேதி முதல் மார்ச் 29ம் தேதி வரை மத்திய குடிமை பணியாளர் தேர்வாணையத்தில் நடைபெற்றது. இதைத் தொடர்ந்து இறுதி தேர்வு முடிவை யு.பி.எஸ்.சி. தனது இணையதளமான www.upsc.gov.in வெளியிட்டுள்ளது.இது குறித்து சங்கர் ஐஏஎஸ் அகடாமி இயக்குனர் வைஷ்ணவி கூறியதாவது: குடிமைப்பணிகளுக்கான தேர்வு 3 கட்டங்களாக நடத்தப்படுகிறது. இதில் நேர்முக தேர்வுக்கு இந்தியா முழுவதும் இருந்து 1994 பேர் கலந்து கொண்டனர். தொடர்ந்து இறுதி தேர்வு முடிவுகள் வெளியிடப்பட்டுள்ளது. இதில் இந்தியா முழுவதும் 759 பேர் தேர்ந்தெடுக்கப்பட்டுள்ளனர். தமிழ்நாட்டில் மட்டும் 39 மாணவர்கள் வெற்றி பெற்றுள்ளனர். அகில இந்திய அளவில் தேர்ச்சி பெற்றவர்களில் 126 பேர் சங்கர் ஐஏஎஸ் அகாடமியில் படித்தவர்கள். தமிழகத்தில் தேர்ச்சி பெற்ற 39 பேரில் 35 பேர் எங்கள் அகாடமியில் படித்தவர்கள்.  

தமிழக அளவில் ரிஷாப் என்ற மாணவர் முதல் இடத்தை பிடித்து சாதனை படைத்துள்ளார். இரண்டாம் இடத்தை லட்சுமி, ரங்கா, 3ம் இடத்தை அபிஷேக்கும் பிடித்துள்ளனர். ஸ்ருஷ்டி தேஷ்முக் என்ற மாணவி அகில இந்திய அளவில் 5ம் இடத்தை பிடித்துள்ளார். தமிழகத்தில் முதல் இடத்தை பிடித்த ரிஷாப் சென்னை மதுராந்தகத்தில் வசித்தவர். தற்போது அந்த மாணவர் டெல்லியில் உள்ளார். அவர் ராஜஸ்தான் மாநிலத்தில் பதவியை தேர்ந்தெடுத்திருந்தார். அதனால், அங்கு அவர் பணியில் சேர்வார் என்பது குறிப்பிடத்தக்கது.

பொருத்தமான வரன்கள் உங்கள் சமூகத்தில், பதிவு இலவசம்! - தமிழ் மேட்ரிமோனி