ஹீரோவுக்கு முத்தம் கொடுக்க மறுத்த ஸ்ரீலீலா

கடந்த 2019ல் கன்னடத்தில் ஹிட்டான ‘கிஸ்’ என்ற படம், தமிழில் ‘கிஸ் மீ இடியட்’ என்ற பெயரில் ரீமேக் செய்யப்பட்டுள்ளது. ஸ்ரீலீலா, வீராட், ரோபோ சங்கர், நாஞ்சில் விஜயன், அஸ்வதி நடித்துள்ளனர். ஜெய்சங்கர் ராமலிங்கம் ஒளிப்பதிவு செய்ய, பிரகாஷ் நிக்கி இசையில் மணிமாறன் பாடல்கள் எழுதியுள்ளார். கன்னடத்தில் இயக்கிய ஏ.பி.அர்ஜூன் தமிழிலும் இயக்கியுள்ளார். வரும் 26ம் தேதி படம் வெளியாகிறது. தன்னை கல்லூரியை விட்டு வெளியேற்றிய முதல்வரின் பேனர் மீது ஸ்ரீலீலா வீசிய கல், தவறுதலாக வீராட் காரில் படுகிறது.

இதனால் ஸ்ரீலீலாவிடம் 4 லட்ச ரூபாய் நஷ்டஈடு கேட்கும் வீராட், பணம் கொடுக்க முடியாது என்றால், தனக்கு ஒரு முத்தம் கொடுக்கும்படி கேட்கிறார். இல்லை என்றால், தன்னிடம் இரண்டு மாதங்கள் உதவியாளராக பணியாற்றும்படி வலியுறுத்துகிறார். அவருக்கு முத்தம் கொடுக்க மறுத்துவிட்டு, இந்த நிபந்தனைக்கு உடன்பட்டு உதவியாளராக சேரும் ஸ்ரீலீலா, தவிர்க்க முடியாத சூழ்நிலையில் தனது காதலை வெளிப்படுத்தும்போது, வீராட் அவரை வேலையை விட்டு வெளியே அனுப்புகிறார். பிறகு ஸ்ரீலீலாவின் காதல் வென்றதா, இல்லையா என்பது கதை.