தமிழில் வெளியான ‘லவ் டுடே’, ‘டிராகன்’ ஆகிய படங்களுக்கு பிறகு பல கோடி ரூபாய் சம்பளம் வாங்கும் இளம் முன்னணி நடிகர்களில் ஒருவராக மாறியுள்ள இயக்குனர் பிரதீப் ரங்கநாதன், மைத்ரி மூவி மேக்கர்ஸ் தயாரிக்கும் பான் இந்தியா படத்தில் நடித்து முடித்துள்ளார். இதை இயக்குனர் சுதா கொங்கரா உதவியாளர் கீர்த்தீஸ்வரன் எழுதி இயக்கியுள்ளார். பிரதீப் ரங்கநாதன் ஜோடியாக ‘பிரேமலு’, ‘ரெபல்’ ஆகிய படங்களின் ஹீரோயின் மமிதா பைஜூ நடித்துள்ளார். ‘டியூட்’ என்று பெயரிடப்பட்டுள்ள இப்படத்தின் பர்ஸ்ட் மற்றும் செகண்ட் லுக் வெளியாகி வைரலானது.
இந்நிலையில் படத்துக்கு மிகப்பெரிய சிக்கல் ஏற்பட்டுள்ளது. அதாவது, டைட்டில் தன்னுடையது என்று நடிகரும், இயக்குனருமான தேஜ் கூறியுள்ளார். இதுகுறித்து அவர் கூறுகையில், ‘ஒரு வருடத்துக்கு முன்பே ‘டியூட்’ என்ற படத்தை நான் அறிவித்து விட்டேன். இந்நிலையில், தற்போது இந்த தலைப்பை மைத்ரி மூவி மேக்கர்ஸ் தனது படத்துக்கு வைத்திருப்பதை அறிந்து அதிர்ச்சி அடைந்தேன். இதுபோன்ற முன்னணி தயாரிப்பு நிறுவனத்தை எதிர்த்து போராடும் எண்ணம் எனக்கு இல்லை. இந்த விஷயத்தை ஏற்கனவே நிறுவனத்திடம் சொல்லிவிட்டேன். அங்கிருந்து ஒரு நல்ல பதிலை எதிர்பார்க்கிறேன்’ என்றார்.
தற்போது தேஜ், ‘டியூட்’ என்ற தலைப்பில் ஒரு படத்தை இயக்கி நடித்து வருகிறார். கால்பந்து விளையாட்டை மையப்படுத்தி உருவாகும் இப்படத்தின் படப்பிடிப்பு முடியும் நிலையில் இருக்கிறது. வரும் ஆகஸ்ட் அல்லது செப்டம்பரில் படம் திரைக்கு வரும் என்று தெரிகிறது.
