வருசநாடு, ஜன. 5: கடமலைக்குண்டு அருகே, ஆட்டுக்கொட்டகையில் பதுக்கி வைத்திருந்த 14 நாட்டு வெடிகுண்டுகளை பறிமுதல் செய்த போலீசார், இது தொடர்பாக தலைமறைவானவரை தேடி வருகின்றனர்.தேனி மாவட்டம், கடமலைக்குண்டு அருகே உள்ள உப்புத்துறை கிராமத்தை சேர்ந்தவர் மச்சக்காளை (55). இவர் நாட்டு வெடிகுண்டுகள் முலம் காட்டுப்பன்றிகளை வேட்டையாடி விற்பதாக போலீசாருக்கு தகவல் கிடைத்தது.
இதன்பேரில், கடமலைக்குண்டு போலீசார் உப்புத்துறை கிராமத்தில் உள்ள மச்சக்காளை வீட்டில் நேற்று சோதனை நடத்தினர். அப்போது வீட்டின் முன்பகுதியில் இருந்த ஆட்டுக் கொட்டகையில், ஒரு துணிப்பையில் நாட்டு வெடிகுண்டுகள் சுற்றி வைத்திருந்ததை கண்டுபிடித்தனர். இதில், 9 வெடிகுண்டுகள் வனவிலங்குகளின் கொழுப்பு தடவப்பட்டவையாகவும், 5 வெடிகுண்டுகள் நூல் சுற்றப்பட்டவையாகவும் இருந்தன. வெடிகுண்டுகளை பறிமுதல் செய்த போலீசார் தலைமறைவான மச்சக்காளையை கைது செய்து விசாரித்து வருகின்றனர்.
The post கடமலைக்குண்டு அருகே 14 நாட்டு வெடிகுண்டுகள் பதுக்கியவர் கைது appeared first on Dinakaran.
