இதயத்தை துடிக்க வைக்க உதவும் சிபிஆர் பயிற்சி முறைகள்!

நன்றி குங்குமம் டாக்டர்

திடீர் ஹார்ட் அட்டக், சடன் கார்டியாக் அரஸ்ட் போன்ற இதய பிரச்னை என்பது இன்றைய காலக்கட்டத்தில் அனைத்து வயதினருக்கும் சர்வ சாதாரணமாக வரும் பிரச்னையாக மாறிவிட்டது. தவறான பழக்கவழக்கங்கள், முறையில்லாத உணவுமுறை மற்றும் உடல் உழைப்பின்மை, உடல் பருமன், மருந்துகளினால் ஏற்படும் பக்கவிளைவுகள் போன்ற காரணங்களால் சிலருக்கு மாரடைப்பு ஏற்படுகிறது. இவ்வாறு திடீரென்று இதயம் செயல்படுவதில் தடைஏற்படும் போது, இதயத்தை மீண்டும் துடிக்க வைக்க செய்வதே CPR எனப்படும் உயிர் மீட்பு சுவாசப் பயிற்சியாகும். இது பற்றி அனைவரும் தெரிந்து வைத்திருக்க வேண்டியது அவசியமாகும்.

மாரடைப்பால் பாதிக்கப்பட்ட ஒருவருக்கு தன்னிச்சையான ரத்த ஓட்டம் மற்றும் சுவாசத்தை மீட்டெடுக்க மருத்துவ உதவி கிடைக்கும் வரை மூளையின் செயல்பாட்டை பாதுகாப்பதற்காக இது செய்யப்படுகிறது. இதனை அறிந்துகொள்வது மிகவும் எளிமையான செயல்முறையாகும்.

செய்முறை:

முதலில் நோயாளியை ஒரு சமமான மேற்பரப்பில் படுக்க வைத்து இரு கைகளையும் ஒன்றன் மேல் ஒன்றாக மார்பின் மையத்தில் வைத்து வழக்கமான அழுத்தத்தை கொடுக்க வேண்டும். மார்பில் கைகளை வைத்து 30 முறை அழுத்தவும். ஒவ்வொரு அழுத்தத்திற்கு பிறகு மார்பு இயல்பு நிலைக்கு வர சில நொடிகள் இடைவெளி கொடுக்க வேண்டும். இதன் பின்னர் வாயோடு வாய் வைத்து CPR பயிற்சியை மேற்கொள்ளலாம்.

நாம் CPR பயிற்சியை சரியாக கொடுத்தால் நோயாளி உயிர் பிழைப்பதற்கான வாய்ப்புகள் அதிகரிக்கும் என மருத்துவ நிபுணர்கள் தெரிவிக்கிறார்கள்.உங்கள் கைகளை ஒன்றன் மீது ஒன்றாக இருக்குமாறு வைத்து விரல்களுக்குள் இடைவெளி இல்லாமல் பார்த்துக் கொள்ள வேண்டும்.மார்பின் மையத்தில் கைகள் வைக்கப்படும் அதே வேளையில் உங்களுடைய தோள்பட்டை கைகளுக்கு நேராக இருக்க வேண்டும். அப்படி இல்லாவிட்டால் கைகளுக்கு சரியான அழுத்தம் கிடைக்காது.

CPR பயிற்சியின் போது மூச்சுக்காற்றை உட்செலுத்தும் நிலை வந்தால் நோயாளியின் தலையை ஒரு கையில் பின்னால் சாய்த்து பிடித்துக்கொண்டு மற்றொரு கையால் கன்னத்தை உயர்த்தி பிடித்துக் கொள்ள வேண்டும். இது நுரையீரலுக்கான காற்றுப்பாதை திறந்திருப்பதை உறுதி செய்கிறது. நீங்கள் 30 முறை மார்பில் அழுத்தம் கொடுக்கிறீர்கள் என்றால் மூச்சுக்காற்றை உட்செலுத்துவது 2 முறை பண்ணலாம்.BLS பயிற்சி குறித்து பள்ளி, கல்லூரி மாணவர்கள், டிராபிக் போலீஸ், தீயணைப்பு படையினர் என அனைவருக்கும் விழிப்புணர்வாக மருத்துவர்கள் ஏற்படுத்தி வருகிறார்கள்.

தொகுப்பு: ரிஷி

The post இதயத்தை துடிக்க வைக்க உதவும் சிபிஆர் பயிற்சி முறைகள்! appeared first on Dinakaran.