- திருவிழா
- யூனியன்
- அரசு
- சென்னை
- கோயம்புத்தூர்
- மதுரை
- திருச்சி
- மத்திய அரசு துறை வேலைவாய்ப்பு விழா
- மத்திய அரசு துறைகள்
சென்னை: ஒன்றிய அரசு துறை வேலைவாய்ப்பு விழாவில் சென்னை, கோவை, மதுரை, திருச்சியில் 1000 பேருக்கு பணி நியமன ஆணைகளை ஒன்றிய அமைச்சர் நிர்மலா சீதாராமன், இணையமைச்சர்கள் பங்கஜ் சௌத்ரி, பத் நாயக், ஜான் பிர்லா ஆகியோர் நேற்று வழங்கினர். இளைஞர்களுக்கு ஆண்டுக்கு 10 லட்சம் வேலைவாய்ப்புகளை வழங்க வேண்டுமென்ற அரசின் தீர்மானத்தை நிறைவேற்றும் வகையில் நாடு முழுவதும் 45 இடங்களில் 71,000க்கும் அதிகமான விண்ணப்பதாரர்களுக்கு பணிநியமன ஆணைகளை பிரதமர் நரேந்திர மோடி நேற்று வழங்கினார். காணொலிக் காட்சி மூலம் பணி நியமன ஆணைகளைப் பெற்றவர்களிடையே அவர் உரையாற்றினார். இதன் ஒரு பகுதியாக மத்திய அரசு துறைகளில் பணிநியமன ஆணைகள் வழங்கும் வேலைவாய்ப்பு விழா அஞ்சல் துறை சார்பில் சென்னை தி.நகரில் நடந்தது. விழாவில் ஒன்றிய நிதி அமைச்சர் நிர்மலா சீதாராமன் சிறப்பு விருந்தினராகக் கலந்து கொண்டார். அஞ்சல் துறை, ரயில்வே அமைச்சகம். சுகாதாரம் மற்றும் குடும்ப நல அமைச்சகம், பெட்ரோலியம் மற்றும் இயற்கை எரிவாயு அமைச்சகம், பாதுகாப்பு அமைச்சகம் போன்ற பல்வேறு துறைகளில் நியமிக்கப்பட்ட 247 பேருக்கு அவர் பணிநியமன ஆணைகளை வழங்கினார்.
இந்த நிகழ்ச்சியில் தமிழ்நாடு வட்ட முதன்மை அஞ்சல் துறைத் தலைவர் ஜே.சாருகேசி, அஞ்சல் மற்றும் வணிக மேம்பாட்டு பிரிவு தலைவர் பி.பி.தேவி, சென்னை நகர மண்டல அஞ்சல் துறைத் தலைவர் ஜி.நடராஜன், சென்னை நகர மண்டல அஞ்சல் துறை இயக்குநர் கே.சோமசுந்தரம் உள்ளிட்டோர் கலந்து கொண்டனர். திருச்சியில் நடந்த விழாவில், ஒன்றிய நிதித்துறை இணையமைச்சர் பங்கஜ் சௌத்ரி பங்கேற்று 238 பேருக்கு பணிநியமன ஆணைகளை வழங்கினார். மதுரையில் நடந்த பணி நியமன ஆணைகள் வழங்கும் விழாவில் ஒன்றிய சுற்றுலா, துறைமுகங்கள், கப்பல் போக்குவரத்து, மற்றும் நீர் வழிப் பாதைகள் துறை இணை அமைச்சர் பத் நாயக் பங்கேற்று 200 பேருக்கு ஆணைகளை வழங்கினார். இவ்விழாவில், மதுரை ரயில்வே கோட்ட மேலாளர் அனந்த், தென் மண்டல அஞ்சல் துறைத் தலைவர் வி.எஸ்.ஜெய்சங்கர் உள்ளிட்டோர் பங்கேற்றனர். கோவையில் நடந்த விழாவில் ஒன்றிய சிறுபான்மையினர் நலத்துறை இணையமைச்சர் ஜான் பிர்லா 371 பேருக்கு பணிநியமன ஆணைகளை வழங்கினார்.
The post ஒன்றிய அரசு துறைகளில் வேலைவாய்ப்பு விழா சென்னை, கோவை, மதுரை, திருச்சியில் 1,000 பேருக்கு பணி நியமன ஆணை: அமைச்சர்கள் வழங்கினர் appeared first on Dinakaran.
