புதுவையில் பாமக ‘க்ளோஸ்’

பாமக நிறுவனர் ராமதாசுக்கும் அவரது மகன் அன்புமணிக்கும் இடையே ஏற்பட்ட மோதலால் கட்சி இரண்டாக உடைந்தது. அன்புமணி பாமகவினர் அதிமுக தலைமையிலான தேசிய ஜனநாயக கூட்டணியில் இணைந்துள்ளனர். ராமதாசின் பாமக, கூட்டணியை ஏற்படுத்தாமல் திரிசங்கு நிலையில் தவித்து வருகிறது. தமிழ்நாட்டில் இந்த நிலை என்றால் புதுவையில் அக்கட்சி இருக்கும் இடம் தெரியாமல் உள்ளது. கடந்த 1996ம் ஆண்டு நடந்த சட்டமன்ற தேர்தலில் புதுவை அரியாங்குப்பம் தொகுதியில் பாமகவில் போட்டியிட்ட ராம்சிங் வெற்றி பெற்றார்.

தொடர்ந்து, 2006ம் ஆண்டு தேர்தலில் அரியாங்குப்பம் தொகுதியில் ராமதாசின் நெருங்கிய உறவினரான அனந்தராமனும், மண்ணாடிப்பட்டு தொகுதியில் அருள்முருகன் என்பவரும் வெற்றி பெற்றனர். கடந்த 2011ம் ஆண்டு அரியாங்குப்பம் தொகுதியில் மீண்டும் அனந்தராமன் போட்டியிட்டு தோல்வி அடைந்தார். பின்னர் அவர் காங்கிரஸ் கட்சியில் ஐக்கியமானார்.

2004ம் ஆண்டு நடந்த நாடாளுமன்ற தேர்தலில் ஐக்கிய முற்போக்கு கூட்டணி சார்பில் பாமக வேட்பாளராக போட்டியிட்ட மு.ராமதாஸ் வெற்றி பெற்றார். 2009ம் ஆண்டு நடந்த நாடாளுமன்ற தேர்தலில் அவர் தோல்வி அடைந்தார். 2016ம் ஆண்டு நடந்த சட்டமன்ற தேர்தலில் 9 தொகுதியில் தனித்து போட்டியிட்டு அனைத்திலும் பாமக டெபாசிட் இழந்தது. 2006ம் ஆண்டுக்கு பிறகு புதுவையில் பாமக பெரும் தடுமாற்றத்தை கண்டு வருகிறது.

2021ம் ஆண்டு சட்டமன்ற தேர்தலிலும் போட்டியிடவில்லை. தற்போது கட்சி இரண்டாக உடைந்து உள்ளதால், இந்த தேர்தலிலும் போட்டியிட மாட்டார்கள் என்றே கூறப்படுகிறது. வன்னியர்களுக்காக ஆரம்பித்த கட்சியான பாமக, புதுவையில் ஜொலிக்காமல் போனதற்கு, வன்னியர் சமூகத்தை சேர்ந்த ரங்கசாமியை இப்பகுதி மக்கள் ஏற்றுகொண்டது தான் முக்கிய காரணமாக பார்க்கப்படுகிறது.