சென்னை மாநகராட்சி பள்ளிகளில் பயோகாஸ் ஆலை அமைக்க திட்டம்

சிறப்பு செய்தி
சென்னை மாநகராட்சி பள்ளிகளில் பயோ காஸ் ஆலைகள் அமைக்க திட்டமிடப்பட்டுள்ளது.
சுத்தமான சமையல் எரிபொருளை ஊக்குவிக்கவும், கழிவுகளை நிலையான முறையில் நிர்வகிப்பது பற்றி மாணவர்களுக்கு கற்பிக்கவும் சென்னை மாநகராட்சி தனது பள்ளிகளில் பயோ காஸ் ஆலைகளை அமைக்க திட்டமிட்டுள்ளது. இந்த திட்டம் ஒன்றுக்கு மேற்பட்ட பள்ளிகளுக்கு உணவு தயாரிக்கும் மைய சமையலறைகள் உள்ள பள்ளி வளாகங்களில் கவனம் செலுத்தும். உணவு கழிவுகளையும், அதிலிருந்து உற்பத்தி செய்யப்படும் சமையல் எரிவாயுவையும் சிறந்த முறையில் பயன்படுத்த இது உதவும்.

இதுகுறித்து சென்னை மாநகராட்சி ஆணையர் குமரகுருபரன் கூறுகையில்,‘ஆர்வமுள்ள தன்னார்வ நிறுவனங்கள், தனிநபர்கள் மற்றும் குடியிருப்பாளர் நல சங்கங்களுடன் இணைந்து இந்த முயற்சியை செயல்படுத்த திட்டமிட்டுள்ளோம். இந்த திட்டம் எல்.பி.ஜி. சிலிண்டர் பயன்பாட்டை குறைத்து, பள்ளிகளில் சமையல் எரிபொருள் செலவுகளை குறைக்கும்,’என்றார்.

முதல்கட்டமாக, தினமும் அதிக அளவில் காய்கறி மற்றும் உணவு கழிவுகள் உருவாகும் நான்கு கிளவுட் கிச்சன்களில் பயோ காஸ் ஆலைகளை நிறுவுவதை மாநகராட்சி பரிசீலித்து வருகிறது. இந்த இடங்களில் உரம் தயாரிப்பு மற்றும் பயோ காஸ் அலகுகளை ஒன்றாக இணைத்து அமைக்க திட்டமிடப்பட்டுள்ளது. இவை நியாயமான விலையில் நிறுவப்பட்டு, நீண்ட நேர பராமரிப்பு தேவையின்றி இயக்க முடியும். கடந்த மாதம் தென்சென்னையில் உள்ள மாநகராட்சி மேல்நிலைப் பள்ளி ஒன்றில் பயோ காஸ் ஆலை வெற்றிகரமாக தொடங்கப்பட்டதை தொடர்ந்து இந்த திட்டம் வருகிறது. 75 கிலோ திறன் கொண்ட இந்த அலகு தன்னார்வலர்களின் சேவை அமைப்பின் ஆதரவுடன் ரூ.5.7 லட்சம் செலவில் நிறுவப்பட்டது.

இந்த பள்ளியில் சுமார் 10 மாநகராட்சி பள்ளிகளுக்கு காலை உணவு தயாரிக்கும் சமையலறை உள்ளது. தற்போது, இந்த ஆலை ஒரு அடுப்புடன் இணைக்கப்பட்டு, தினமும் கிட்டத்தட்ட 15 முதல் 20 கிலோ உணவு கழிவுகளை செயலாக்கி, சமையலறையின் எரிபொருள் தேவையில் ஒரு பகுதியை பூர்த்தி செய்யும் வாயுவை உற்பத்தி செய்கிறது. இந்த அமைப்பு இரண்டு மாதங்களுக்கு ஒரு எல்.பி.ஜி. சிலிண்டரை சேமிக்கும் என்று எதிர்பார்க்கப்படுகிறது. பள்ளியில் சுமார் 250 மாணவர்கள் நேரடியாக பயனடைகின்றனர். சுற்றுச்சூழல் விழிப்புணர்வு நடவடிக்கைகளின் ஒரு பகுதியாக சுத்தமான ஆற்றல் மற்றும் கழிவு மேலாண்மை கருத்துகளை விளக்குவதற்கும் இந்த ஆலை பயன்படுத்தப்படுகிறது. மாநகராட்சி இந்த திட்டத்தை படிப்படியாக மேலும் பல பள்ளிகளில் விரிவுபடுத்த திட்டமிட்டுள்ளது.

திட்டத்தின் நன்மைகள்
 எல்.பி.ஜி. சிலிண்டர் செலவு குறையும்
 உணவு கழிவுகள் பயனுள்ள வாயுவாக மாறும்
 மாணவர்களுக்கு சுத்தமான ஆற்றல் பற்றி நேரடி அனுபவம்
 உரம் உற்பத்தி மூலம் தோட்டக்கலைக்கு உதவும்
 சுற்றுச்சூழலுக்கு நன்மை

முந்தைய வெற்றி
கடந்த ஆண்டு அடையாறில் உள்ள மற்றொரு மாநகராட்சி பள்ளியில் குடியிருப்பாளர் சங்கம் மற்றும் சுற்றுச்சூழல் குழுவின் ஆதரவுடன் இதேபோன்ற பயோ காஸ் அலகு நிறுவப்பட்டது. இந்த ஆலை 10 மாத காலத்தில் 7 காஸ் சிலிண்டர்களை சேமிக்க உதவியது என்று பள்ளி அதிகாரிகள் தெரிவித்தனர். இந்த காலத்தில் சுமார் 3,200 கிலோ உணவு மற்றும் ஈரக் கழிவுகள் குப்பையாக கொட்டப்படாமல் தவிர்க்கப்பட்டன. உற்பத்தி செய்யப்பட்ட வாயு கிட்டத்தட்ட 270 மணி நேரம் சமையலுக்கு பயன்படுத்தப்பட்டது.