சென்னை: சமூக நீதி மற்றும் சமத்துவத்தை நிலைநாட்டிட தேசிய மக்கள் தொகை கணக்கெடுப்புடன் சாதிவாரியான கணக்கெடுப்பினை இணைத்து நடத்திட வேண்டும் என பிரதமர் மோடிக்கு முதல்வர் மு.க.ஸ்டாலின் கடிதம் எழுதியுள்ளார். முதல்வர் மு.க. ஸ்டாலின் அனுப்பிய கடிதத்தில் கூறியிருப்பதாவது: இந்தியாவில் சமூக நீதியை நிலைநாட்டி, வளர்ச்சியின் பலன்களை மிகவும் பாதிக்கப்படக்கூடிய பிரிவினருக்கு கொண்டு செல்வதற்கும், வலிமையான, அனைவரையும் உள்ளடக்கிய இந்தியாவை உருவாக்குவதற்கும் ஏதுவாக, தேசிய மக்கள் தொகை கணக்கெடுப்புடன், விரிவானதொரு சாதிவாரி கணக்கெடுப்பை இணைத்து நடத்துவதற்கான ஏற்பாடுகளை ஒன்றிய அரசு உடனடியாக தொடங்கிட வேண்டும்.

2021ம் ஆண்டு மக்கள் தொகை கணக்கெடுப்பு நடைபெறாத நிலையில், வரவிருக்கக்கூடிய தேசிய மக்கள் தொகை கணக்கெடுப்பில், சாதிவாரியான கணக்கெடுப்பினை இணைத்து நடத்திட வேண்டும், மாநில அளவில் இதற்கான நல்ல முயற்சிகள் மேற்கொள்ளப்பட்டு இருந்தாலும், இந்தியாவின் சட்டப்பூர்வ மக்கள்தொகை கணக்கெடுப்பு, முக்கியமான சாதி தொடர்பான தரவு உள்ளீடுகளுடன் மேற்கொள்ளப்பட்டால் மட்டுமே, சமூக நீதி, சமத்துவம் போன்றவற்றை நிலைநாட்டிட இயலும், சமமான மற்றும் உள்ளடக்கிய வளர்ச்சியை உறுதி செய்திட இயலும்.

கடந்த 1931ம் ஆண்டு இந்தியாவில் சாதிவாரி கணக்கெடுப்பு நடத்தப்பட்டது. கடந்த 90 ஆண்டுகளில், நம் நாட்டின் மக்கள்தொகை மற்றும் சமூக-பொருளாதார நிலப்பரப்பு பல மாற்றங்களுக்கு உட்பட்டுள்ளது. ஆனால் நமது சமூகத்தின் பின்தங்கிய பிரிவினர் பல கொள்கைகள் காரணமாக தொடர்ந்து பின்தங்கிய நிலையில் உள்ளனர். பீகார் போன்ற சில மாநில அரசுகள் சாதி அடிப்படையிலான கணக்கெடுப்பை வெற்றிகரமாக நடத்தி உள்ளது. மேலும் சில மாநிலங்கள் அத்தகைய நடவடிக்கைகளை அறிவித்துள்ளன. இந்த மாநில குறிப்பிட்ட முன்முயற்சிகள் மற்றும் அவற்றின் தரவு முடிவுகள் நமது சமூகம் மற்றும் அதன் தேவைகள் பற்றிய நுண்ணறிவுகளை வழங்குவதில் மிகவும் பயனுள்ளதாக இருந்தாலும், உள்ளீடுகள் மற்றும் செயல்முறைகளின் நாடு தழுவிய ஒப்பீட்டின் நன்மை அவற்றிற்கு இல்லை.

எனவே, முக்கியமான சாதி தொடர்பான தரவு உள்ளீடுகளுடன் கூடிய இந்திய சட்டப்பூர்வ மக்கள்தொகை கணக்கெடுப்பு மட்டுமே சமூக நீதியை நிலைநிறுத்துவதற்கான பொருத்தமான தளத்தை வழங்க முடியும். தேசிய மக்கள்தொகை கணக்கெடுப்புடன் ஜாதிவாரி மக்கள்தொகை கணக்கெடுப்பை ஒருங்கிணைப்பதன் மூலம் மட்டுமே நமது சமூகத்தின் சாதி அமைப்பு மற்றும் சமூக-பொருளாதார குறிகாட்டிகளில் அதன் பிரதிபலிப்பு பற்றிய விரிவான மற்றும் நம்பகமான தரவுகளை வழங்க முடியும்.

தேசிய மக்கள் தொகை கணக்கெடுப்புடன் சாதிவாரியான கணக்கெடுப்பினை இணைத்து நடத்திட வேண்டும். இந்த முன்முயற்சி, வளர்ச்சியின் பலன்களை மிகவும் பாதிக்கப்படக்கூடிய பிரிவினருக்கு எடுத்து செல்வதற்கும் வலிமையானதாகவும் அனைவரையும் உள்ளடக்கிய இந்தியாவை உருவாக்குவதற்கும் ஒரு மகத்தான நடவடிக்கையாக இருக்கும் என்பதில் எனக்கு எந்த சந்தேகமும் இல்லை. இந்த விஷயத்தில் உங்கள் தனிப்பட்ட தலையீட்டை எதிர்பார்க்கிறேன். இவ்வாறு கடிதத்தில் முதல்வர் மு.க.ஸ்டாலின் குறிப்பிட்டுள்ளார்.

* இந்தியாவின் சட்டப்பூர்வ மக்கள்தொகை கணக்கெடுப்பு, முக்கியமான சாதி தொடர்பான தரவு உள்ளீடுகளுடன் மேற்கொள்ளப்பட்டால் மட்டுமே, சமூக நீதி, சமத்துவம் போன்றவற்றை நிலைநாட்டிட இயலும்.

* ஆனால் நமது சமூகத்தின் பின்தங்கிய பிரிவினர் பல கொள்கைகள் காரணமாக தொடர்ந்து பின்தங்கிய நிலையில் உள்ளனர்.

* இதன் மூலம் சமமான மற்றும் உள்ளடக்கிய வளர்ச்சியை உறுதி செய்திட இயலும்.

* கடந்த 90 ஆண்டுகளில், நம் நாட்டின் மக்கள்தொகை மற்றும் சமூக-பொருளாதார நிலப்பரப்பு பல மாற்றங்களுக்கு உட்பட்டுள்ளது.

* முக்கியமான சாதி தொடர்பான தரவு உள்ளீடுகளுடன் கூடிய இந்திய சட்டப்பூர்வ மக்கள்தொகை கணக்கெடுப்பு மட்டுமே சமூக நீதியை நிலைநிறுத்துவதற்கான பொருத்தமான தளத்தை வழங்க முடியும்.

The post தேசிய மக்கள்தொகை கணக்கெடுப்புடன் சாதிவாரி கணக்கெடுப்பை நடத்த வேண்டும்: பிரதமர் மோடிக்கு முதல்வர் மு.க.ஸ்டாலின் கடிதம் appeared first on Dinakaran.