கிருஷ்ணகிரி, அக்.16: கிருஷ்ணகிரியில், கோரிக்கையை வலியுறுத்தி ரேஷன் கடை பணியாளர் சங்கம் சார்பில் நேற்று ஆர்ப்பாட்டம் நடத்தப்பட்டது. ரேஷன் கடைகள் மூடப்பட்டதால் பொருட்கள் வாங்க முடியாமல் மக்கள் தவிப்புக்குள்ளாகினர். சம வேலைக்கு சம ஊதியம் உள்ளிட்ட 30 அம்ச கோரிக்கையை வலியுறுத்தி, தமிழகம் முழுவதும் ரேஷன் கடை பணியாளர்கள் நேற்று முதல் காலவரையற்ற வேலைநிறுத்தத்தை தொடங்கியுள்ளனர். கிருஷ்ணகிரி மாவட்டத்திலுள்ள 1,050 ரேஷன் கடைகளில் 850 கடைகள் மூடப்பட்டது. இதனால் பொருட்கள் வாங்க சென்ற மக்கள் ஏமாற்றத்துடன் திரும்பி சென்றனர். கோரிக்கைகளை வலியுறுத்தி, கிருஷ்ணகிரி புதிய பஸ் நிலையம் அருகில் ரேஷன் பணியாளர் சங்கம் சார்பில் ஆர்ப்பாட்டம் நடந்தது. இதற்கு மாவட்ட தலைவரும், மாநில துணைத்தலைவருமான சோமேஸ்வரன் தலைமை வகித்தார்.