சென்னை: சட்டப்பேரவையில் நேற்று, நாகைமாலி (மார்க்சிஸ்ட்) கவனஈர்ப்பு தீர்மானம் கொண்டு வந்து பேசும்போது, ‘‘கடந்த 2017-18ம் ஆண்டு 12ம் வகுப்பு பயின்ற மாணவர்களுக்கு மடிக்கணினி வழங்க வேண்டும்” என்று கோரிக்கை வைத்தார். இதற்கு பள்ளி கல்வித்துறை அமைச்சர் மகேஷ் பொய்யாமொழி விளக்கம் அளித்து பேசியதாவது: 2011ம் ஆண்டு முதல் மாணவர்களுக்கு மடிக்கணினி வழங்கும் திட்டம் செயல்படுத்தப்பட்டு வருகிறது. 2011-12 முதல் 2019-20ம் ஆண்டு முடிய இத்திட்டத்தின் கீழ் 45,71,675 மாணவர்கள் பயன்பெற்றுள்ளனர். இதற்காக ரூ.6349.63 கோடி செலவிடப்பட்டுள்ளது. 2017-18ம் கல்வியாண்டில் பயின்ற மாணவர்களில் சென்னை, கோயம்புத்தூர், ஈரோடு, காஞ்சிபுரம், மதுரை, பெரம்பலூர், சேலம், தேனி ஆகிய எட்டு மாவட்ட மாணவர்களுக்கு விலையில்லா மடிக்கணினிகள் முழுமையாக வழங்கப்பட்டுள்ளது.