சென்னை: தமிழகத்தில் கொரோனா பரவலை கட்டுப்படுத்த தமிழக அரசு தீவிர நடவடிக்கைகளை எடுத்து வருகிறது. மேலும், கொரோனா நோயாளிகளுக்கு தேவைப்படும் ஆக்சிஜன் படுக்கைகள் கொண்ட கோவிட் சிறப்பு மையங்களை முதல்வர் மு.க.ஸ்டாலின் திறந்து வைத்து வருகிறார். அந்தவகையில், நேற்று முன்தினம் ராயப்பேட்டை வெஸ்லி மேல்நிலைப்பள்ளியில் 130 ஆக்சிஜன் படுக்கைகளை திறந்து வைத்தார். தொடர்ந்து, நேற்று காலை சைதாப்பேட்டை அரசு மருத்துவமனையில் அமைக்கப்பட்டுள்ள 130 ஆக்சிஜன் படுக்கைகள் கொண்ட கோவிட் கேர் மையத்தை முதல்வர் திறந்து வைத்தார். அப்போது, உலக சுகாதார அமைப்பின் இந்திய மருத்துவ அலுவலர்கள் டாக்டர் கே.என்.அருண்குமார் மற்றும் கே.சுரேந்திரன் ஆகியோர் உலக சுகாதார அமைப்பின் சார்பில் 100 ஆக்சிஜன் செறிவூட்டிகளை வழங்கினர்.