மூணாறு: மூணாறில் உள்ள சாலைகளில் நேற்று அதிகாலை காட்டு யானைகள் உலா வந்தன. காட்டு யானைகள் அடிக்கடி ஊருக்குள் நுழைவதால் பொதுமக்கள் அச்சமடைந்துள்ளனர். பிரசித்தி பெற்ற சுற்றுலாத்தலமான கேரள மாநிலம், மூணாறை சுற்றிலும் அடர்ந்த வனப்பகுதி உள்ளது. கொரோனா ஊரடங்கால் வாகன போக்குவரத்து தடை செய்யப்பட்டதுடன், வணிக நிறுவனங்களும் மூடப்பட்டுள்ளதால் பொதுமக்கள் வீடுகளில் முடங்கி கிடக்கின்றனர். இதனால் கடந்த 50 நாட்களாக மூணாறு வெறிச்சோடி கிடக்கிறது. இரவு நேரங்களில் அருகில் உள்ள வனப்பகுதியிலிருந்து வெளியேறும் யானைகள் மூணாறு மற்றும் சுற்றுப்பகுதிகளில் உள்ள குடியிருப்புகளில் அடிக்கடி நுழைந்து விடுகின்றன.கடந்த 2 தினங்களுக்கு முன்பு மூணாறு அருகே அடிமாலியை சேர்ந்த பிரின்ஸ்(45), நேற்று முன்தினம் சாந்தம்பாறை அருகே சுந்தல் பகுதியை சேர்ந்த டென்னிஸ்(38) யானை தாக்கியதில் படுகாயமடைந்தனர். கடந்த சில தினங்களாக ‘படையப்பா’ என்று அழைக்கப்படும் ஆண் யானை, இரவு நேரங்களில் மூணாறு நகருக்குள் அடிக்கடி வலம் வருகிறது.