கொள்ளிடம்: கொள்ளிடம் அருகே பெரம்பூர் கிராமம் பொதுகுளத்தில் கொட்டப்படும் பிளாஸ்டிக் பொருட்களால் சுற்றுசூழல் பாதிக்கும் நிலை ஏற்பட்டுள்ளது. நாகை மாவட்டம் கொள்ளிடம் அருகே பெரம்பூர் கிராமத்தில் ஊராட்சிக்குச் சொந்தமான பொதுக்குளம் உள்ளது. கடந்த 20 ஆண்டுகளுக்கும் முன்பு வாய்க்காலின் வழியே தண்ணீர் வந்து தேங்கியும், பின்னர் உடனுக்குடன் வடிய வைக்கும் வகையில் வடிகால் வாய்க்காலும் அமைக்கப்பட்டிருந்தது. 2 ஏக்கர் பரப்பளவில் அமைந்திருந்த இந்த பொதுக்குளம் தூர்வாரப்படாமல் விடப்பட்டது. இதனால் குளம் தூர்ந்து போய் கட்டாந்தரையாக காட்சியளிக்கிறது. இந்த குளத்திற்கு உள்ள உரிய வாய்க்கால்கள் தூர்ந்து போயுள்ளதால் தண்ணீர் இக்குளத்திற்கு வரமுடியாத நிலை ஏற்பட்டுள்ளது. ஒரு காலத்தில் இக்கிராமத்தில் உள்ளவர்கள் குளிப்பதற்கும், கால்நடைகளுக்கும் இந்த குளத்து நீரைப் பயன்படுத்தி வந்தனர்.