50 வருடம் கழித்தும் ஜி.வி.பிரகாஷ் ஸ்கூல் பையனா நடிக்கலாம்: விஜய் சேதுபதி ஜாலி பேச்சு

சென்னை: ஜி.வி.பிரகாஷ் குமார், ஸ்ரீகவுரி பிரியா, அப்பாஸ், ஜார்ஜ் மரியன், பிரார்த்தனா நாதன், அதிர்ச்சி அருண், மதுரை முத்து, சோஃபா பாய் ரசூல் நடித்துள்ள படம், ‘ஹேப்பி ராஜ்’. பியாண்ட் பிக்சர்ஸ் தயாரித்துள்ளது. மதன் கிறிஸ்டோபர் ஒளிப்பதிவு செய்ய, ஜஸ்டின் பிரபாகரன் இசை அமைத்துள்ளார். பிரதீப் ரங்கநாதன் உதவியாளர் மரியா ராஜா இளஞ்செழியன் எழுதி இயக்கியுள்ளார். வரும் 27ம் தேதி திரைக்கு வரும் இப்படத்தின் பிரீ-ரிலீஸ் நிகழ்ச்சியில், சிறப்பு விருந்தினராக கலந்துகொண்ட விஜய் சேதுபதி பேசியதாவது: என்னையும் தயாரிப்பாளர்கள் சங்க தேர்தலில் போட்டியிட சொன்னார்கள். எனக்கு இதெல்லாம் செட்டாகாது என்று சொல்லிவிட்டேன். படத்தில் ஏதாவது பஞ்சாயத்து என்று உட்கார்ந்து, அதற்கு நான் தீர்ப்பு வழங்கி, பிறகு எனது படத்துக்கு ஏதாவது வெச்சி செய்துவிடுவார்களோ என்ற பயம்தான் அதற்கு காரணம். பொறுப்பு கொடுத்தால், அந்த பொறுப்பை ரொம்ப பொறுப்பாக செய்ய வேண்டும். அதை செய்த பிறகு ஏதாவது பிரச்னை வந்தால் எப்படி? ஜி.வி.பிரகாஷ் குமார் எப்போதுமே ஸ்கூல் பையனாக நடிக்கலாம் போலிருக்கிறது. 90ஸ், ஜென் ஸீ, இன்னும் 50 வருடங்கள் கழித்து படமெடுத்தால் கூட, அவர் ஸ்கூல் பையனாக நடிப்பார். இந்த படம் வெற்றிபெற வாழ்த்துகிறேன்.