×

ஷாருக்கானுடன் இணைகிறார் விஜய் சேதுபதி

சென்னை: ஷாருக்கான் நடிக்கும் ஜவான் இந்தி படத்தில் விஜய் சேதுபதி நடிப்பது உறுதியாகியுள்ளது. ராஜா ராணி, தெறி, மெர்சல், பிகில் படங்களை இயக்கியவர் அட்லீ. இவர் முதல்முறையாக பாலிவுட்டுக்கு சென்று, ஷாருக்கான் நடிக்கும் ஜவான் படத்தை இயக்கி வருகிறார். இந்த படத்தில் ஷாருக்கானுடன் முதல்முறையாக நயன்தாரா ஜோடி சேருகிறார். நயன்தாரா நடிக்கும் முதல் இந்தி படம் இது. பிரியாமணி, சான்யா மல்ஹோத்ரா, யோகி பாபு உள்பட பலர் நடிக்கிறார். இந்த படத்தின் முன்னோட்டம், சமீபத்தில் வெளியிடப்பட்டது.

இது சமூக வலைத்தளத்தில் வைரலானது. படத்தில் வில்லன் கேரக்டரில் நடிக்க ராணா ஒப்பந்தமாகி இருந்தார். அவர் படத்தில் தொடர்ந்து நடிக்க முடியாத சூழல் ஏற்பட்டுள்ளது. இதையடுத்து படத்திலிருந்து ராணா விலகியுள்ளார். அவருக்கு பதிலாக யாரை நடிக்க வைக்கலாம் என்ற கேள்வி எழுந்தபோது, விஜய் சேதுபதியை இதில் நடிக்க வையுங்கள் என ஷாருக்கானே அட்லீயிடம் சொல்லியிருக்கிறார். திரைப்பட விழா ஒன்றில் சூப்பர் டீலக்ஸ் படம் பார்த்துவிட்டு, விஜய் சேதுபதியின் நடிப்பை வெகுவாக பாராட்டியவர் ஷாருக்கான். இந்திய சினிமாவில் விஜய் சேதுபதி இருப்பது எங்களுக்கெல்லாம் பெருமையான விஷயம் என கூறியிருந்தார்.

மேலும் ஆமிர்கான் நடிப்பில் லால் சிங் சட்டா படத்திலேயே விஜய் சேதுபதி நடிக்க வேண்டியது. கால்ஷீட் பிரச்னையால் அவர் நடிக்கவில்லை. இதையடுத்து நாக சைதன்யா அந்த வேடத்தில் நடித்தார். இதையெல்லாம் மனதில் வைத்து, விஜய் சேதுபதி இதில் நடித்தால் நன்றாக இருக்கும் என ஷாருக்கான் கூறியிருக்கிறார். இது பற்றி அட்லீ சொன்னதும், தனது வேறுபடங்களின் கால்ஷீட்டை மாற்றியமைத்து இந்த படத்துக்கு தேதிகள் கொடுத்துவிட்டார் விஜய் சேதுபதி. இந்த மாதம் இறுதியில் சென்னையில் ஜவான் படத்தின் ஷூட்டிங் நடைபெற உள்ளது. இதில் விஜய் சேதுபதி பங்கேற்க உள்ளார்.

Tags : Vijay Sethupathi ,Shah Rukh Khan ,
× RELATED நடிகர் விஜய் சேதுபதி தாக்கியதாக மகா...