சென்னை: எஸ்டிபிஐ கட்சியின் தேசிய துணைத் தலைவர் முகமது ஷபி நேற்று வெளியிட்ட அறிக்கை: சிறுபான்மையினருக்கு எதிரான கொடூரமான வக்பு திருத்த மசோதாவை, எஸ்டிபிஐ கட்சி சட்ட ரீதியாகவும், அரசியல் ரீதியாகவும் அனைத்து ஜனநாயக வழிகளிலும் எதிர்த்துப் போராடும். இந்த மசோதா, முழுவதும் தீங்கிழைக்கும் நோக்கத்துடன் வடிவமைக்கப்பட்டு, வக்பு சொத்துகளை அபகரிப்பதையும், முஸ்லிம் நிறுவனங்களின் சுயாட்சியை அழிப்பதையும் நோக்கமாகக் கொண்டு, முஸ்லிம் சமூகத்தின் மீது திட்டமிட்டு நடத்தப்படும் தாக்குதலாக உள்ளது.

பாஜ தலைமையிலான அரசாங்கம், அதன் வகுப்புவாத நிகழ்ச்சி நிரலால் உந்தப்பட்டு, இந்திய முஸ்லிம் சமூக மக்கள் மீதான அதன் ஆழமான விரோதத்தை மீண்டும் ஒருமுறை வெளிப்படுத்தியுள்ளது. ஒன்றிய அரசு சொல்வது போல, இந்த மசோதா சீர்திருத்தம் அல்ல; இது மத சிறுபான்மையினரின் அரசியலமைப்பு உரிமைகளுக்கு எதிரான வெளிப்படையான ஆக்கிரமிப்புச் செயலாகும்.

முஸ்லிம் அல்லாதவர்களை வக்பு வாரியங்களுக்குள் திணிக்க கட்டாயப்படுத்துவதன் மூலம், அரசாங்கம் இந்திய அரசியலமைப்பின் பிரிவு 26ல் குறிப்பிடப்பட்டுள்ள மத சுயாட்சியின் அடித்தளத்தையே மீறுகிறது. பாஜவின் வகுப்புவாத அரசியலும், பொறுப்பற்ற வெறுப்பு நடவடிக்கைகளும் இந்தியாவுக்கு பெரும் விலை கொடுக்கும், சமூக பிளவுகளை ஆழமாக்கும் மற்றும் அரசியலமைப்பு மதிப்புகளை குறைமதிப்பிற்கு உட்படுத்தும். ஆகவே, இந்த மசோதாவுக்கு எதிரான சட்ட மற்றும் ஜனநாயகப் போராட்டத்தில் இணைய எஸ்டிபிஐ கட்சி அழைப்பு விடுக்கிறது. இவ்வாறு அதில் கூறப்பட்டுள்ளது.

The post வக்பு திருத்த மசோதா சிறுபான்மை சமூகத்தின் மீதான வெளிப்படையான தாக்குதல்: எஸ்டிபிஐ கண்டனம் appeared first on Dinakaran.