பெரம்பூர்: புளியந்தோப்பு பகுதியை சேர்ந்தவர் பிரியா (44, பெயர் மாற்றப்பட்டுள்ளது). இவருக்கு திருமணமாகி 18 வயதில் ஒரு மகளும் 13 வயதில் ஒரு மகனும் உள்ளார்கள். இவரது கணவர் கூலி வேலை செய்து வருகிறார். மகன் தனியார் பள்ளியில் 8ம் வகுப்பு படித்து வருகிறார். கடந்த 26ம் தேதி பிரியா தனது 13 வயது மகனை அருகில் உள்ள மளிகை கடைக்கு சென்று பொருட்கள் வாங்கி வர அனுப்பி வைத்துள்ளார். அப்போது அதே பகுதியில் குடியிருக்கும் ரமேஷ் (36) என்பவர் சிறுவனை தனது வீட்டிற்கு அழைத்துச் சென்று பாலியல் சீண்டலில் ஈடுபட்டுள்ளார். மேலும் மறுநாளும் சிறுவன் அவ்வழியாக செல்லும் போது சிறுவனிடம் மீண்டும் பாலியல் சீண்டலில் ஈடுபட்டுள்ளார்.
இதுகுறித்து சிறுவன் தனது அம்மாவிடம் வீட்டிற்கு வந்து கூறி அழுதுள்ளார். அதன்பிறகு புளியந்தோப்பு அனைத்து மகளிர் காவல் நிலையத்தில் பிரியா புகார் அளித்தார். புளியந்தோப்பு அனைத்து மகளிர் காவல் நிலைய போலீசார் சிறுவனிடம் விசாரணை நடத்தி நேற்று காலை புளியந்தோப்பு டிகாஸ்ட்டர் ரோடு பகுதியைச் சேர்ந்த ரமேஷ் (36) என்பவரை கைது செய்தனர். இவர் கார் டிரைவராக பணிபுரிந்து வருவதும் சம்பவத்தன்று குடிபோதையில் சிறுவனிடம் பாலியல் சீண்டலில் ஈடுபட்டதும் தெரிய வந்தது. இதனையடுத்து ரமேஷ் மீது போக்சோ சட்டத்தின் கீழ் வழக்கு பதிவு செய்த புளியந்தோப்பு அனைத்து மகளிர் காவல் நிலைய போலீசார் அவரை நீதிமன்றத்தில் ஆஜர்படுத்தி சிறையில் அடைத்தனர்.
The post சிறுவனுக்கு பாலியல் தொல்லை போக்சோவில் டிரைவர் கைது appeared first on Dinakaran.
