சென்னை: தங்கம் விலை அதிரடியாக சவரனுக்கு ரூ.160 குறைந்தது. இந்த விலை குறைவு நகை வாங்குவோரை மகிழ்ச்சியடைய செய்துள்ளது. தங்கம் விலை கடந்த 2 மாதமாக ஒரு நிலையில் இல்லாமல் உயர்வதும், குறைவதுமாக இருந்து வருகிறது. கடந்த 23ம் தேதி ஒரு சவரன் ரூ.44,168க்கு விற்கப்பட்டது. 24ம் தேதி ஞாயிற்றுக்கிழமை என்பதால் தங்கம் விலையில் மாற்றம் இல்லை. அதன் பிறகு 25ம் தேதியில் இருந்து தங்கம் விலை குறைந்து வருகிறது. 25ம் தேதி தங்கம் விலை சவரன் ரூ.8 குறைந்து ஒரு சவரன் ரூ.44,160க்கு விற்கப்பட்டது.

26ம் தேதி சவரனுக்கு ரூ.120 குறைந்து ஒரு சவரன் ரூ.44,040க்கு விற்பனையானது. நேற்று முன்தினம் தங்கம் விலை கிராமுக்கு ரூ.25 குறைந்து ஒரு கிராம் ரூ.5,480க்கும், சவரனுக்கு ரூ.200 குறைந்து ஒரு சவரன் ரூ.43,840க்கும் விற்கப்பட்டது. நேற்று தங்கம் விலை யாரும் எதிர்பாராத வகையில் அதிரடியாக சரிவை சந்தித்தது. அதாவது, நேற்று தங்கம் விலை கிராமுக்கு ரூ.70 குறைந்து ஒரு கிராம் ரூ.5,410க்கும், சவரனுக்கு ரூ.560 குறைந்து ஒரு சவரன் ரூ.43,280க்கும் விற்கப்பட்டது.

இந்த நிலையில் தங்கம் விலை சவரனுக்கு ரூ.160 குறைந்து ரூ.43,120க்கும் கிராமுக்கு ரூ.20 குறைந்து ரூ. 5,390க்கும் விற்பனை செய்யப்படுகிறது. தங்கம் விலை கடந்த ஒரு வாரத்தில் மட்டும் ரூ.1048க்கு விலை சரிந்துள்ளது. இந்த அதிரடி விலை குறைவு நகை வாங்குவோரை மகிழ்ச்சியில் ஆழ்த்தியுள்ளது. ஆனால் சென்னையில் சில்லறை வர்த்தகத்தில் ஒரு கிராம் வெள்ளி ரூ.1 உயர்ந்து ரூ.77. 50க்கு விற்பனை செய்யப்படுகிறது.

The post தங்கம் விலை ஒரே வாரத்தில் ரூ.1040 சரிவு… ஒரு சவரன் ரூ. 43,120க்கு விற்பனை… நகை பிரியர்கள் ஹாப்பி!! appeared first on Dinakaran.