நாகை, ஏப்.5: நாகை அருகே திருமருகலில், நாகை தொகுதி விடுதலை சிறுத்தைகள் கட்சி வேட்பாளர் முகமது ஷா நவாஸை ஆதரித்து நடந்த பிரசாரத்தின்போது, இந்திய கம்யூனிஸ்ட் கட்சி மாநில செயலாளர் முத்தரசன் பேசியதாவது:234 தொகுதிகளிலும் மதசார்பற்ற முற்போக்கு கூட்டணி தான் வெற்றி பெறும் என்பதில் எந்த சந்தேகமும் இல்லை. நான் ஜோதிடம் பார்ப்பவன் இல்லை. அதில் எனக்கு நம்பிக்கையும் இல்லை. ஒரு தேர்தலில் ஒரு அணி எப்படி வெற்றி பெறுகிறது. எப்படி வெற்றி வாய்ப்பை இழக்கிறது என்பதற்கு இரண்டு இலக்கணம் உள்ளது. ஒன்று அரசியல் பலம் இருக்க வேண்டும். மற்றொன்று அணியின் பலம் இருக்க வேண்டும். இந்த இரண்டும் சேர்ந்தே அமைந்தது மதச்சார்பற்ற முற்போக்கு கூட்டணி, அதிமுகவிற்கு அரசியல் பலம் மிக மிக பலவீனமாக இருக்கிறது. அதன் காரணமாகத்தான் அரசியல் பேச மறுக்கிறார்கள்.