புதுடெல்லி: இந்தியாவின் முதல் தனியார் ராக்கெட் விக்ரம்-1 வெற்றிகரமாக விண்ணில் ஏவப்பட்டது குறித்து பேசிய பிரதமர் மோடி, ‘‘56 வயதுடைய இளைஞரைப் பற்றி நான் பேசவில்லை’’ என மறைமுகமாக ராகுல் காந்தியை கிண்டல் செய்தார். நாடாளுமன்ற மழைக்கால கூட்டத்தொடரில் நேற்று பங்கேற்க வந்த பிரதமர் மோடி நாடாளுமன்ற வளாகத்தில் செய்தியாளர்களுக்கு அளித்த பேட்டியில், ‘‘கடந்த ஆண்டு மழைக்கால கூட்டத்தொடருக்கு சற்று முன்பாக ஒரு இந்தியர் சர்வதேச விண்வெளி நிலையத்திற்கு சென்று சாதனை படைத்தார். இம்முறை இளம் இந்திய ஸ்டார்ட் அப் நிறுவனமான ஸ்கைரூட் ஏரோஸ்பேஸ் விக்ரம்-1 ராக்கெட்டை வெற்றிகரமாக விண்ணில் ஏவி அசாதாரண சாதனை படைத்துள்ளது.
அந்நிறுவனத்தின் பணிபுரியும் குழுவின் சராசரி வயது 28 என கூறினார்கள். இளம் சிந்தனையாளர்கள் இதை சாத்தியமாக்கி உள்ளனர். 56 வயதுடைய இளைஞரைப் பற்றி நான் பேசவில்லை. வெறும் 28 வயதுடைய இளம் குழுவினர் விண்வெளித் துறையில் இந்தியாவின் தேசியக் கொடியை நிலைநாட்டியதை பற்றி பேசுகிறேன்’’ என்றார்.மக்களவை எதிர்க்கட்சி தலைவர் ராகுல் காந்திக்கு, கடந்த மாதம் 19ம் தேதி 56 வயது பூர்த்தியடைந்தது குறிப்பிடத்தக்கது.
