பெங்களூரு: லட்சக்கணக்கான மக்களுக்காக தினமும் இயங்கும் ஹோட்டல்கள், உணவகங்கள், விடுதிகள் மற்றும் பிற நிறுவனங்களுக்கு கியாஸ் விநியோகம் தடைபட்டுள்ளது. போதுமான வணிக சிலிண்டர் விநியோகத்தை உறுதி செய்ய ஒன்றிய அரசு நடவடிக்கை எடுக்க வேண்டும் என ஒன்றிய பெட்ரோலியம் மற்றும் இயற்கை எரிவாயுதுறை அமைச்சருக்கு கர்நாடக முதலமைச்சர் சித்தராமையா கடிதம் அனுப்பியுள்ளார்.
மேலும் அவரின் கடிதத்தில்; “மத்திய பெட்ரோலியம் மற்றும் இயற்கை எரிவாயு அமைச்சகம் வெளியிட்ட திருத்தப்பட்ட உத்தரவின்படி, எல்.பி.ஜி உற்பத்திக்கு முன்னுரிமை அளிக்கவும், எண்ணெய் நிறுவனங்களால் விநியோகிக்கப்படும் எல்.பி.ஜி-யை உள்நாட்டு நுகர்வோருக்கு (வீட்டு உபயோகம்) மட்டுமே பிரத்யேகமாக சந்தைப்படுத்தவும் அறிவுறுத்தப்பட்டுள்ளது. நாடு முழுவதும் உள்ள வீடுகளுக்கு தடையற்ற எல்.பி.ஜி விநியோகத்தை உறுதி செய்யும் இந்த உத்தரவின் நோக்கம் வரவேற்கத்தக்கது என்றாலும், இதன் அமலாக்கத்தால் பெங்களூருவில் வணிகப் பயன்பாட்டு எல்.பி.ஜி சிலிண்டர்களுக்கு எதிர்பாராத தட்டுப்பாடு ஏற்பட்டுள்ளது என்பதை உங்கள் கவனத்திற்குக் கொண்டு வருகிறேன்.
பெங்களூருவில் உள்ள பல ஹோட்டல்கள் மற்றும் உணவக சங்கங்கள், தங்களால் வணிகப் பயன்பாட்டு சிலிண்டர்களைப் பெற முடியவில்லை என்றும், விநியோகம் சீராகாவிட்டால் உணவகங்களை தற்காலிகமாக மூட வேண்டிய நிலை ஏற்படும் என்றும் கவலை தெரிவித்துள்ளன. பெங்களூருவில் லட்சக்கணக்கான மக்களுக்கு உணவளிக்கும் சிறிய உணவகங்கள், மெஸ் வசதிகள் மற்றும் கேட்டரிங் அலகுகள் எனப் பெரிய அளவிலான கட்டமைப்பு உள்ளது.
எண்ணெய் நிறுவனங்களுடனான ஆலோசனைகளின்படி, மாநிலத்தின் வணிக எல்.பி.ஜி தேவையை பாரம்பரியமாக மூன்று எண்ணெய் நிறுவனங்கள் பூர்த்தி செய்து வருகின்றன—IOCL (நாளொன்றுக்கு சுமார் 500-550 மெட்ரிக் டன்), HPCL (சுமார் 300 மெட்ரிக் டன்) மற்றும் BPCL (சுமார் 230 மெட்ரிக் டன்). தற்போது ஏற்பட்டுள்ள இந்தத் திடீர் விநியோகத் தடை, பெங்களூருவில் உள்ள ஹோட்டல்கள் மற்றும் வணிக நிறுவனங்களை கடுமையாகப் பாதித்துள்ளது. இது நகரத்தின் அன்றாட வாழ்க்கையில் நேரடி பாதிப்பை ஏற்படுத்தும்.
இந்தச் சிக்கல், வீட்டை விட்டு வெளியே தங்கி பணிபுரியும் நபர்கள் மற்றும் மாணவர்கள் என ஹோட்டல்களையும் மெஸ்களையும் நம்பி இருப்பவர்களையும் பெருமளவில் பாதிக்கிறது. மேலும், திருமண மண்டபங்கள் (சௌல்ட்ரி), விடுதிகள் மற்றும் சமூக நிகழ்வுகள் நடைபெறும் இடங்களும் உணவு தயாரிப்பிற்கு வணிக எல்.பி.ஜி-யையே நம்பியுள்ளன. குறிப்பாக திட்டமிடப்பட்ட சமூக நிகழ்வுகளின் போது இது பெரும் நிச்சயமற்ற நிலையை உருவாக்கியுள்ளது.
பெங்களூரு போன்ற ஒரு பெருநகரத்தில் வணிக எல்.பி.ஜி-யின் தேவையை கருத்தில் கொண்டு, ஹோட்டல்கள், உணவகங்கள், திருமண மண்டபங்கள் மற்றும் இதர வணிக நிறுவனங்களுக்குப் போதுமான வணிக எல்.பி.ஜி விநியோகம் கிடைப்பதை உறுதி செய்ய தாங்கள் தலையிட வேண்டுமெனக் கேட்டுக்கொள்கிறேன். தற்போதைய விநியோகத் தட்டுப்பாட்டைச் சரிசெய்ய எண்ணெய் நிறுவனங்களுக்கு உரிய அறிவுறுத்தல்களை வழங்குவது இந்தச் சூழலைத் தணிக்க உதவும்.
இந்த விவகாரத்தில் விரைவான தீர்வு காண்பது, வணிகங்கள் சுமுகமாக இயங்குவதை உறுதி செய்வதுடன், இந்தச் சேவைகளைத் தினசரி நம்பியிருக்கும் ஆயிரக்கணக்கான குடிமக்களுக்கு ஏற்படும் சிரமத்தைத் தவிர்க்கவும் உதவும். இந்த விஷயத்தில் தங்களின் அவசரக் கவனிப்பையும், தேவையான நடவடிக்கையையும் வேண்டுகிறேன்” என தெரிவித்துள்ளார்.
