புதுடெல்லி: நாடாளுமன்ற பட்ஜெட் கூட்டத்தொடர் தொடங்குவதற்கு முன்பாக அனைத்து கட்சி ஆலோசனைக் கூட்டம் நடைபெற உள்ளது. நாடாளுமன்றத்தின் பட்ஜெட் கூட்டத்தொடர் இந்த மாதம் 28ம் தேதி தொடங்கி, வரும் ஏப்ரல் மாதம் 2ம் தேதி வரை நடைபெற உள்ளது. இடையில் ஒரு இடைவெளியுடன் நடைபெறவுள்ள இந்தத் தொடரில், வரும் பிப்ரவரி மாதம் 1ம் தேதி 2026-27ம் நிதியாண்டிற்கான பட்ஜெட் தாக்கல் செய்யப்பட உள்ளது. இந்தச் சூழலில் நாடாளுமன்ற கூட்டத்தொடர் தொடங்குவதற்கு முன்பாக, மரபுப்படி நடைபெறும் அனைத்து கட்சி கூட்டம் வரும் 27ம் தேதி நடைபெற உள்ளது.
நாடாளுமன்ற இணைப்பு கட்டடத்தில் உள்ள முதன்மை குழு அறையில், நாடாளுமன்ற விவகாரங்கள் துறை அமைச்சர் தலைமையில் இந்த கூட்டம் நடைபெறுகிறது. இதுகுறித்து நாடாளுமன்ற வட்டாரங்கள் கூறும்போது, ‘எதிர்வரும் நாடாளுமன்ற கூட்டத்தொடரில் விவாதத்திற்கு வரவிருக்கும் முக்கிய பிரச்னைகள் மற்றும் சட்ட மசோதாக்கள் குறித்தும், அவையை சுமூகமாக நடத்துவது குறித்தும், அனைத்து கட்சி கூட்டத்தில் ஒன்றிய அரசு தரப்பில் விரிவாக ஆலோசிக்கப்படும்’ என்று தெரிவித்தன.
