டெல்லி: விஜய் நடித்துள்ள ஜனநாயகன் திரைப்பட மேல்முறையீட்டு வழக்கை உச்சநீதிமன்றம் தள்ளுபடி செய்தது. ஜனநாயகன் தணிக்கை சான்று விவகாரத்தில் உயர்நீதிமன்ற அமர்வு ஜனவரி 20ம் தேதி விசாரித்து முடிவெடுக்கும்’ என உச்சநீதிமன்றம் தெரிவித்துள்ளது.

விஜய் நடித்த ஜனநாயகன் திரைப்பட தணிக்கை சான்றிதழ் வழக்கு உச்சநீதிமன்றத்தில் இன்று விசாரணைக்கு வந்தது. நீதிபதிகள் தீபங்கர் தத்தா, அகஸ்டின் ஜார்ஜ் மசிஹ் அமர்வில் ஜனநாயகன் பட வழக்கு விசாரணைக்கு வந்தது. ஜனநாயகன் திரைப்பட தணிக்கை சான்று விவகாரம் தொடர்பாக உச்ச நீதிமன்றத்தில் தயாரிப்பு நிறுவனம் மேல்முறையீடு செய்தது.

ஜனநாயகன் படத்துக்கு தணிக்கை சான்றிதழ் வழங்க தனி நீதிபதி ஆஷா உத்தரவிட்டிருந்தார். தனி நீதிபதி ஆணைக்கு உயர்நீதிமன்ற தலைமை நீதிபதி அமர்வு விதித்த இடைக்கால தடையை எதிர்த்து மேல்முறையீடு செய்யப்பட்டது.

ஜனநாயகன் திரைப்படம் தொடர்பான வழக்கில் உச்சநீதிமன்றத்தில் சென்சார் போர்டு கேவியட் மனு தாக்கல் செய்துள்ளது. தணிக்கை சான்று வழங்காததால் ஜனநாயகன் ரிலீஸ், தேதி குறிப்பிடாமல் ஒத்திவைக்கப்படுவதாக அறிவிக்கப்பட்டிருந்தது.

இந்நிலையில், ஜனநாயகன் படத் தயாரிப்பு நிறுவனத்தின் மேல்முறையீட்டு மனுவை தள்ளுபடி செய்து உச்சநீதிமன்றம் உத்தரவிட்டுள்ளது. ஜனநாயகன் படத்திற்கு சென்சார் சான்றிதழ் வழங்க கோரி படத் தயாரிப்பு நிறுவனம் தொடர்ந்த மேல்முறையீட்டு வழக்கில் உயர்நீதிமன்றத்தையே அணுகுமாறு உச்சநீதிமன்றம் உத்தரவிட்டுள்ளது.

மேலும் இந்த விவகாரத்தில் சென்னை உயர்நீதிமன்றம் வழங்கிய உத்தரவில் நாங்கள் தலையிட விரும்பவில்லை எனவும் ஜனநாயகன் தணிக்கை சான்று விவகாரத்தில் உயர்நீதிமன்ற அமர்வு ஜனவரி 20ம் தேதி விசாரித்து முடிவெடுக்கும் எனவும் உச்சநீதிமன்றம் தெரிவித்துள்ளது.