புதுடெல்லி: சுங்கச்சாவடியிலிருந்து 20 கி.மீ. சுற்றளவிற்குள் வசிக்கும் மக்கள், ராஜமார்கயாத்ரா மொபைல் செயலி மூலம் உள்ளூர் பயணச்சீட்டை டிஜிட்டல் முறையில் வாங்கலாம். இது அந்த மாதத்தில் அந்தந்த சுங்கச்சாவடி வழியாக வரம்பற்ற பயணத்தை மேற்கொள்ள அனுமதிக்கும் என்று தேசிய நெடுஞ்சாலை ஆணையம் தெரிவித்துள்ளது.முன்னதாக, பயணிகள் தங்கள் தகுதியை உறுதிப்படுத்த, சுங்கச்சாவடிக்கு நேரில் சென்று துணை ஆவணங்களைச் சமர்ப்பிக்க வேண்டியிருந்தது. புதிய டிஜிட்டல் கட்டமைப்பின் கீழ், இந்த முழு செயல்முறையையும் இப்போது சில நிமிடங்களுக்குள் டிஜிட்டல் முறையில் முடிக்க முடியும்.

புதிதாக அறிமுகப்படுத்தப்பட்ட உள்ளூர் பயணச்சீட்டு அம்சம், தகுதியுள்ள பயணிகள் சுங்கச்சாவடிக்குச் செல்லாமலேயே ராஜமார்கயாத்ரா மொபைல் செயலி மூலம் டிஜிட்டல் முறையில் சுங்கச்சாவடி பயணச்சீட்டை வாங்க உதவுகிறது. டெல்லி முண்ட்கா பக்கர்வாலா சுங்கச்சாவடியில் முதல் டிஜிட்டல் உள்ளூர் சுங்கச்சாவடி அனுமதிச்சீட்டு வசதி அறிமுகப்படுத்தப்பட்டுள்ளது. வரும் மாதங்களில் நாடு முழுவதும் உள்ள மற்ற சுங்கச்சாவடிகளிலும் இது விரிவுபடுத்தப்படும். டிஜிலாக்கர் மற்றும் வாகன் உள்ளிட்ட அரசாங்க டிஜிட்டல் தளங்களுடன் ஒப்புதல் அடிப்படையிலான ஒருங்கிணைப்பைப் பயன்படுத்தி, பயணிகளின் முகவரி, வாகன எண் மற்றும் இணைக்கப்பட்ட ஃபாஸ்டேக் விவரங்களைத் தானாகவே மீட்டெடுக்கிறது.