கியாராவை புலம்ப வைத்த கீது

பாலிவுட் முன்னணி நடிகை கியாரா அத்வானி, ராம் சரண் ஜோடியாக தெலுங்கில் நடித்த ‘கேம் சேஞ்சர்’, இந்தியில் ஹ்ரித்திக் ரோஷன், ஜூனியர் என்டிஆர் ஆகியோருடன் நடித்த ‘வார் 2’ ஆகிய படங்கள் படுதோல்வி அடைந்த நிலையில், தற்போது கன்னடத்தில் நடிகை கீது மோகன்தாஸ் இயக்கும் ‘டாக்ஸிக்: எ ஃபேரி டேல் ஃபார் குரோன்-அப்ஸ்’ என்ற பான்வேர்ல்ட் படத்தில் யஷ்ஷுடன் இணைந்து நடித்துள்ளார். அவரை தவிர நயன்தாரா, ருக்மணி வசந்த், ஹூமா குரேஷி, தாரா சுதாரியா ஆகியோரும் நடித்துள்ளனர்.

இப்படத்தில் கியாரா அத்வானி தோன்றியுள்ள சில காட்சிகள் வெளியாகி, அவரது ரசிகர்கள் மத்தியில் பலத்த அதிர்ச்சியை ஏற்படுத்தி இருக்கிறது. காரணம், யஷ்ஷுடன் இணைந்து அவர் நடித்த மிக நெருக்கமான காட்சிகள் வைரலானதை தொடர்ந்து, அவரை பலர் கடுமையாக விமர்சித்து வருகின்றனர். எனவே, தனது கிளாமர் காட்சியை படத்தில் இருந்து உடனே நீக்கும்படி கீது மோகன்தாஸுக்கு கியாரா அத்வானி அழுத்தம் கொடுத்துள்ளதாக தகவல் வெளியாகியுள்ளது.

நடிக்கும்போது அவருக்கு தர்மசங்கடம் ஏற்படவில்லை என்றாலும், தற்போது கிளிம்ப்ஸ் பார்க்கும்போது நெருடலாக இருப்பதுடன், படம் வெளியான பிறகு தனது இமேஜ் கடுமையாக பாதிக்கும் என்று நினைக்கிறார். அக்காட்சிகள் தனக்கு குடும்ப ரீதியாக பல்வேறு பிரச்னைகளை ஏற்படுத்தும் என்பதால், கீது மோகன்தாஸிடம் வேண்டுகோள் விடுத்திருக்கிறார். அவர் சொல்வதை கேட்டு அக்காட்சிகளை நீக்கினால், கதையின் ஓட்டத்துக்கு ஏதாவது தடங்கல் ஏற்படுமோ என்று தயங்கும் கீது மோகன்தாஸ், பதில் சொல்லாமல் அமைதியாக காலம் கடத்தி வருகிறார்.