ரீ படத்தில் சத்தம்தான் பேய்

பேய் படங்கள் விதவிதமாக வந்து கொண்டிருக்கிறது. வெள்ளை உருவம்தான் பேய் என்கிற நிலை மாறி பொம்மை, காற்று, நேரம், தண்ணீர்கூட பேயாக சினிமாவில் வந்து விட்டது. அந்த வரிசையில் சத்தம் பேயாக வரும் படம் ரீ.
இப்படத்தை சுந்தரவடிவேல் எழுதி இயக்கியுள்ளார் .அவரே தனது ஸ்ரீஅங்கா புரொடக்ஷன்ஸ் சார்பில் தயாரித்துள்ளார். இது கதாநாயகியை மையப்படுத்திய கதையைக் கொண்ட படம். இப்படத்தில் ' ஹர மகாதேவி ' படத்தில் நடித்த காயத்ரி ரமா நாயகியாக நடித்துள்ளார்.பாலச்சந்தரின் ஆஸ்தான எழுத்தாளர் அனந்துவின் தங்கையின் பேரன் பிரசாந்த் ஸ்ரீனிவாசன் நாயகனாக நடித்துள்ளார்.

மேலும் பிரசாத் , சங்கீதா பால், மணி சங்கர் ,சுரேஷ் பாபு ஆகியோரும் நடித்துள்ளனர். படத்தின் இயக்குநரும் ஒரு முக்கிய கதாபாத்திரத்தில் நடித்துள்ளார். படத்திற்கு ஒளிப்பதிவு தினேஷ்ஸ்ரீநிவாஸ், பின்னணி இசை ஸ்பர்ஜன் பால்.
படம் பற்றி இயக்குனர் சுந்தரவடிவேல் கூறியதாவது: முற்றிலும் வணிக மயமாகிப் போய்விட்ட இந்த வாழ்க்கைச் சூழலில் தொழில்நுட்பம் உலகத்தை உள்ளங்கைக்குள் இணைக்கிறது. உலகத் தொடர்புகள் மிக விரைவில் சாத்தியமாகிறது. ஆனால் அருகிலிருக்கும் வீடுகளில் இருப்பவர் யார்? அங்கு என்ன நடக்கிறது என்று தெரிவதில்லை.

இந்த படத்தில் நாயகியின் பக்கத்து வீட்டிலிருந்து ஒரு சத்தம் வருகிறது. அது  அவளை அலைக்கழிக்கிறது. அவளைச் சமநிலை இழக்கச் செய்கிறது. பக்கத்து வீட்டில் ஒரு நாகரிகமான டாக்டர் குடும்பம் தான் வசிக்கிறது. இந்நிலையில் எங்கிருந்து சத்தம் வருகிறது அதன் பின்னணி என்ன என்று ஆராய முற்படும் போது பல மர்மங்கள் விரிகின்றன. எதிர்பாராத திசையில் சம்பவங்கள் நடக்கின்றன. அவை என்ன ? அவற்றைப் பற்றிப் பேசும் படம் இது.