நினைத்த காரியம் நிறைவேற்றும் பாலமுருகன் கோயில்

கடந்த 50 ஆண்டுகளுக்கு முன்பு இக்கோயில் அமைந்துள்ள இடம் காடாக இருந்தது. இப்பகுதியில் பள்ளம் தோண்டியபோது முருகரின் வேல் கிடைத்துள்ளது. அதே இடத்தில் அந்த வேலை நட்டு பொதுமக்கள் வழிபட்டு வந்துள்ளனர். 1973ல் சிறிய கோயிலாக அமைத்து, அங்கு பாலமுருகரை வைத்து வழிபட தொடங்கினர். 1975ல் சுண்ணாம்பு கல் மூலம் கோயில் கட்டப்பட்டு கும்பாபிஷேகம் நடத்தப்பட்டது. பிறகு, 2001ல் கோயில் விரிவுபடுத்தப்பட்டு மீண்டும் கும்பாபிஷேகம் நடத்தப்பட்டது. இக்கோயிலின் ராஜகோபுரம் 72 அடியில் கம்பீரமாக காட்சியளிக்கிறது. கடைசியாக 2014ல் மிகப்பெரிய அளவில் திருப்பணிகள் செய்யப்பட்டு கோலாகலமாக கும்பாபிஷேகம் நடத்தப்பட்டது. கோயில் வளாகத்தை சுற்றி விநாயகர், மயிலம்மாள், தட்சணாமூர்த்தி, ஆஞ்சநேயர், பெருமாள், காசி விஸ்வநாதர், காசி விசாலாட்சி, துர்க்கை, ஐயப்பன், காலபைரவர், நவகிரகங்கள், சூரியன், சந்திரன் ஆகியோருக்கு தனித்தனியாக சன்னதிகள் அமைந்துள்ளன.

குழந்தை இல்லாதவர்கள் பாலமுருகரை தரிசித்து விட்டு, கோயில் வளாகத்தில் உள்ள அரசமரத்தில் தொட்டில் கட்டி விட்டு சென்றால் குழந்தை பாக்கியம் கிடைக்கும் என்ற நம்பிக்கை நிலவுகிறது. பாலமுருகரை பயபக்தியுடன் வேண்டி சஷ்டி விரதம் இருந்தால், பக்தர்கள் நினைத்த காரியங்கள் நிறைவேறும் என்பது ஐதீகம். மேலும், நாகதோஷம் உள்ளவர்கள் கோயில் வளாகத்தில் உள்ள நாக தேவதையை வணங்கினால் தோஷம் விலகும். விரைவில் திருமணமும் கை கூடும் என்று பக்தர்கள் நம்புகிறார்கள்.