கும்மிடிப்பூண்டி: கும்மிடிப்பூண்டி அருகே கார் திருட்டில் ஈடுபட்ட 2 பேரை போலீசார் கைது செய்தனர். கும்மிடிப்பூண்டி அருகே சூறாவளி கண்டிகை பகுதியைச் சேர்ந்தவர் தியாகராஜன் (37). இவர் அதே பகுதியில் பெட்ரோல் பங்க் நடத்தி வருகிறார். இந்த நிலையில் கடந்த 14ம் தேதி வழக்கம்போல், தனது சொகுசு காரை பெட்ரோல் பங்க் அருகே நிறுத்திவிட்டு அருகே உள்ள வீட்டுக்குச் சென்றுள்ளார். மறுநாள் காரை எடுக்க வந்தபோது கார் காணாமல் போனது தெரியவந்தது. இதனால் அதிர்ச்சியடைந்த தியாகராஜன் சிப்காட் காவல் நிலையத்தில் புகார் அளித்தார். அதன்பேரில் சப் இன்ஸ்பெக்டர் பாபு தலைமையிலான தனிப்படை போலீசார் பழவேற்காடு, பொன்னேரி, எளாவூர் உள்ளிட்ட சுற்றுவட்டார பகுதிகளில் தொடர்ந்து வாகன தணிக்கையில் ஈடுபட்டனர்.
இதைத்தொடர்ந்து நேற்று காலை பெத்திக்குப்பம் அருகே அதே பதிவெண் கொண்ட கார் ஒன்று வந்துள்ளது. அதனை மடக்கி சோதனை செய்தபோது, அது திருடு போன தியாகராஜன் கார் என்பது உறுதியானது. அதில் பயணித்த இருவரை சிப்காட் காவல் நிலையம் கொண்டு வந்து விசாரணை நடத்தினர். விசாரணையில் அவர்கள் பொன்னேரி மெதூர் பகுதியைச் சேர்ந்த சத்தியநாராயணன் (37), எளாவூர் பகுதியைச் சேர்ந்த நேதாஜி (28) ஆகியோர் என்பது தெரியவந்தது. இருவர் மீதும் சிப்காட் போலீசார் வழக்குப்பதிவு செய்து பொன்னேரி நீதிமன்றத்தில் ஆஜர்படுத்தி புழல் சிறையில் அடைத்தனர்.
The post கும்மிடிப்பூண்டி அருகே கார் திருட்டில் ஈடுபட்ட 2 பேர் பிடிபட்டனர் appeared first on Dinakaran.
