சென்னை: மோடி கன்னியாகுமரி வருகையொட்டி அதற்கு எதிர்ப்பு தெரிவிக்கும் வகையில் சென்னை முழுவதும் ஒட்டப்பட்டுள்ள ‘கோ-பேக் மோடி’ போஸ்டரால் பரபரப்பு ஏற்பட்டுள்ளது. நாடாளுமன்ற தேர்தல் இறுதிக்கட்ட பிரசாரம் இன்று மாலையோடு நிறைவடைகிறது. இதனை தொடர்ந்து வருகிற 1ம் தேதி வாக்குப்பதிவு நடைபெறுகிறது. தொடர்ந்து ஜூன் 4ம் தேதி முடிவு வெளியாகவுள்ளது. இந்தநிலையில் பஞ்சாப் மாநிலம் ஹோஷியார்பூரில் இறுதிகட்ட பிரசாரத்தை பிரதமர் மோடி முடித்து விட்டு இன்று மாலை விமானம் மூலம் திருவனந்தபுரம் வருகிறார். அங்கிருந்து ஹெலிகாப்டர் மூலம் கன்னியாகுமரிக்கு மாலை 4.35 மணிக்கு வரவுள்ளார்.
இந்நிலையில் மோடியின் தமிழக வருகைக்கு எதிர்ப்பு தெரிவித்து தேர்தல் ஆணையத்தில் காங்கிரஸ் மற்றும் திமுக சார்பாக மனுக்கள் கொடுக்கப்பட்டுள்ளது. தேர்தல் நடத்தை விதிமுறைகள் அமலில் இருக்கும் நிலையில் மோடி தனது தியானத்தின் மூலம் இறுதி கட்ட தேர்தலில் வாக்குகளை கவர திட்டமிடுவதாக புகார் தெரிவிக்கப்பட்டுள்ளது.ஆனால் தேர்தல் ஆணையம் பிரதமர் மோடியின் தியானத்திற்கு எந்தவித தடையும் தற்போது வரை விதிக்கவில்லை. இதனிடையே சென்னை முழுவதும் ஒட்டப்பட்டுள்ள ‘கோ-பேக் மோடி’ போஸ்டரால் பரபரப்பு ஏற்பட்டுள்ளது. இறுதிக்கட்ட தேர்தல் பிரசாரத்தை முடித்துவிட்டு தமிழ்நாட்டிற்கு வரும் பிரதமர் நரேந்திர மோடியை கண்டித்து சென்னை உயர்நீதிமன்ற திமுக வழக்கறிஞர் ஹேமந்த் அண்ணாதுரை என்பவர் சென்னை முழுவதும் இரவோடு இரவாக #GoBackModi என்ற போஸ்டர்களை ஒட்டி பரபரப்பு ஏற்படுத்தியுள்ளார்.
“ஒடிசா தேர்தல் பரப்புரையில் தமிழர்களை இழிவுபடுத்திவிட்டு, தமிழ்நாட்டிற்கே வருவதா?” என போஸ்டருக்கு தலைப்பிட்டு Hello Netizens… Ready Start 1 2 3 #GoBackModi என Twitter Trending-க்கு அழைப்புவிடும் வகையிலும், இந்திய தேர்தல் ஆணையமே தூங்காதே…! எனவும் சென்னை முழுவதும் ஒட்டப்பட்டுள்ள இந்த போஸ்டரால் பெரும் பரபரப்பு ஏற்ப்பட்டுள்ளது. இந்த போஸ்டர்கள் சென்னை உயர்நீதிமன்ற வளாகம், சென்னை சென்ட் ரல் ரயில் நிலையம், அரசு மருத்துவமனை, அண்ணா மேம்பாலம், எம்எல் ஏ விடுதி, சென்னை பத்திரிக்கையாளர் மன்றம், அண்ணா அறிவாலயம், கிரீன் வேஸ் சாலை போன்ற முக்கிய இடங்களில் அதிகளவில் ஒட்டப்பட்டுள்ளது.
The post மோடி கன்னியாகுமரி வருகை; சென்னை முழுவதும் ஒட்டப்பட்டுள்ள ‘கோ-பேக் மோடி’ போஸ்டரால் பரபரப்பு: டிவிட்டரில் டிரெண்ட் appeared first on Dinakaran.
