மதுரை: சிண்டிகேட் தீர்மானங்கள் குறித்து விசாரிக்க தனிக்குழு அமைக்க வேண்டுமென அரசு செயலருக்கு ஐகோர்ட் கிளை உத்தரவிட்டுள்ளது. தஞ்சை தமிழ் பல்கலைக்கழக தொழில்நுட்ப பணியாளர்களான செல்வம், சுவாமிநாதன் ஆகியோர் ஐகோர்ட் மதுரை கிளையில் தாக்கல் செய்த மனு: சிண்டிகேட் ஒப்புதல்படி 7 மற்றும் 14 ஆண்டுகள் பணியாற்றியவர்களை போல, தேர்வு நிலை, சிறப்பு நிலை அந்தஸ்து மற்றும் ஊதிய உயர்வு, பணப்பலன்களை கேட்டு ஏற்கனவே ஐகோர்ட் கிளையில் வழக்கு தொடர்ந்திருந்தோம். அந்த வழக்கில், தேர்வு நிலை, சிறப்பு நிலை பதவி உயர்வு வழங்கப்பட்டு, அதற்குரிய பணப்பலன்களை பெற்றவர்களின் ஊதியத்தில் கூடுதலாக வழங்கிய பணத்தை பிடித்தம் செய்ய நீதிமன்றம் உத்தரவிட்டது. ஆனால் தேர்வு நிலை, சிறப்பு நிலை பதவி உயர்வுக்கான ஊதிய உயர்வு பெறாத எங்களின் ஊதியத்திலும் பிடித்தம் செய்ய உத்தரவிடப்பட்டுள்ளது. எனவே, ஐகோர்ட்டின் முந்தைய உத்தரவை மாற்றியமைக்க வேண்டும். இவ்வாறு கூறியிருந்தனர்.
இந்த மனுவை விசாரித்த நீதிபதி எஸ்.ஸ்ரீமதி பிறப்பித்த உத்தரவு: பல்கலைக்கழக பணி நியமனங்கள் குறித்து டாக்டர் குழந்தைசாமி தலைமையிலான குழு ஆய்வு நடத்தி அரசுக்கு அறிக்கை அளித்துள்ளது. இந்த அறிக்கை அடிப்படையில் தமிழக அரசு 11.7.2009ல் பிறப்பித்த அரசாணையில் அரசிடம் முன் அனுமதி பெற்றே பல்கலைக்கழகங்களில் பணி நியமனங்கள் மேற்கொள்ள வேண்டும் எனக் கூறப்பட்டுள்ளது. இது 16.7.2009க்கு பிறகு நடைபெறும் பணி நியமனங்களுக்கு மட்டுமே பொருந்தும். அதற்கு முன்பு நடந்த பணி நியமனங்களுக்கு பொருந்தாது. பல்கலைக்கழகங்களில் 7 மற்றும் 14 ஆண்டுகள் பணிபுரிந்தவர்களுக்கு தேர்வு நிலை, சிறப்பு நிலை பதவி உயர்வு வழங்கும் தவறை அனைத்து பல்கலைக்கழங்களும் செய்கின்றன. இதன் மூலம் பல்கலைக்கழக நிர்வாகம் தவறாக வழி நடத்தப்படுகின்றன. தவறான நிர்வாகத்துக்கு எந்த பல்கலைக்கழகமும் விதிவிலக்கு அல்ல. பல்கலைக்கழங்களில் சிண்டிகேட் நிறைவேற்றப்பட்ட தீர்மானங்கள் குறித்து விசாரிக்க தமிழ் வளர்ச்சி மற்றும் தகவல்துறை செயலர் தனிக்குழு அமைக்க வேண்டும். இவ்வாறு உத்தரவிட்டுள்ளார்.
The post தஞ்சை தமிழ் பல்கலைக்கழகத்தின் சிண்டிகேட் தீர்மானங்கள் குறித்து விசாரிக்க தனிக்குழு: ஐகோர்ட் கிளை உத்தரவு appeared first on Dinakaran.
