ஜகார்த்தா: இந்தோனேசியாவை சேர்ந்த பிரபல சமூக வலைதள இன்ப்ளுயன்சர் அடுக்குமாடி குடியிருப்பில் மர்மமான முறையில் இறந்து கிடந்த சம்பவம் அதிர்ச்சியை ஏற்படுத்தியுள்ளது. இந்தோனேசியாவை சேர்ந்த லூலா லஹ்பா (26) என்ற இளம்பெண், இன்ஸ்டாகிராம் மற்றும் டிக் டாக் செயலிகளில் 33 லட்சத்திற்கும் அதிகமான பின்தொடர்பவர்களைக் கொண்ட பிரபல இன்ப்ளுயன்சர் ஆவார். இவர் கடந்த 2025ம் ஆண்டு ஜூலை மாதம் முதல் பிரபல யூடியூபர் மற்றும் இசைக்கலைஞரான ரெசா ஒக்டோவியன் என்பவருடன் காதலில் இருந்து வந்ததுடன், இருவருக்கும் விரைவில் திருமணம் நடக்கவுள்ளதாகக் கூறப்பட்டது.
இதற்கிடையே கடந்த புத்தாண்டு சமயத்தில் சிறுநீரக கல் பிரச்னை மற்றும் உடல்நலக்குறைவு காரணமாக இவர் மருத்துவமனையில் சிகிச்சை பெற்று வந்தார். இந்நிலையில் நேற்று தெற்கு ஜகார்த்தாவில் உள்ள அடுக்குமாடி குடியிருப்பில் லூலா லஹ்பா மர்மமான முறையில் இறந்து கிடப்பதாகப் பாதுகாப்புப் பணியாளர்கள் தகவல் கொடுத்தனர். இந்தத் தகவல் வெளியாவதற்குச் சில மணி நேரத்திற்கு முன்பு, அவரது காதலரான ரெசா ஒக்டோவியனின் இசைக்குழு தனது நிகழ்ச்சியை திடீரென ரத்து செய்தது.
இதுகுறித்து அந்த இசைக்குழு வெளியிட்ட அறிவிப்பில், ‘எங்கள் குழுவில் ஒருவருக்கு துரதிர்ஷ்டவசமான சம்பவம் நடந்துள்ளது. அவர் நிகழ்ச்சியில் பங்கேற்கும் மனநிலையில் இல்லை’ என்று குறிப்பிட்டிருந்தது. சம்பவ இடத்திற்கு விரைந்து வந்த போலீசார் உடலைக் கைப்பற்றி விசாரணை நடத்தி வருகின்றனர். லூலா லஹ்பாவின் மரணத்திற்கான காரணம் இன்னும் அதிகாரப்பூர்வமாக அறிவிக்கப்படாத நிலையில், அவரது மருத்துவ அறிக்கைகளை வைத்துப் போலீசார் விசாரணையைத் தீவிரப்படுத்தியுள்ளனர்.
