புதுச்சேரி: புதுச்சேரியில் 5ம் தேதி விஜய் ரோடு ேஷாவுக்கு அனுமதி கேட்டு தவெக சார்பில் 3வது முறையாக மனு கொடுக்கப்பட்டது. ஆனால் காவல்துறை அனுமதி வழங்காது என தகவல் வெளியாகி உள்ளது. புதுச்சேரியில் தவெக தலைவர் விஜய் டிசம்பர் 5ம்தேதி ரோடு ஷோவுக்கு அனுமதி கேட்டு கடந்த 25ம்தேதி முதல்வர் ரங்கசாமி மற்றும் காவல்துறை தலைமையகத்தில் புதுச்சேரி தவெக நிர்வாகிகள் மனு அளித்தனர். கடற்கரை சாலை காலாப்பட்டில் தொடங்கி கன்னியகோயில் வரை 25 கிமீ சாலை மார்க்கமாக மக்களை சந்திக்கவும், உப்பளம் சோனாம்பாளையத்தில் ஒலிபெருக்கி மூலம் உரையாற்றவும் அனுமதி கேட்டது. இதற்கு புதுச்சேரி காவல்துறை அனுமதி மறுத்துவிட்டது.
கரூர் துயர சம்பவத்துக்குபின் ரோடு ஷோ நடத்த அம்மாநில அரசின் வழிகாட்டுதல், அரசியல் கட்சிகளின் பரிந்துரைகள் உயர்நீதிமன்றத்தில் சமர்ப்பிக்கப்பட்ட நிலையில், எந்த உத்தரவும் பிறப்பிக்கப்படாததால் புதுச்சேரி காவல்துறை பின்வாங்குவதாக கூறப்பட்டது. மேலும் குறுகிய சாலையான சோனாம்பாளையத்தில் தமிழகத்தில் இருந்தும் அதிகளவில் ரசிகர்கள் குவிந்தால் அசம்பாவிதம் ஏற்படலாம் என்பதால் அனுமதி வழங்குவதில் சிக்கல் நீடிக்கிறது. இதையடுத்து கடந்த 29ம்தேதி தவெக பொதுச்செயலாளர் புஸ்ஸி ஆனந்த், பாஜ முன்னாள் எம்எல்ஏ சாமிநாதன் ஆகியோர் டிஜிபி, ஐஜியை சந்திக்க வந்தனர். அங்கு இருவரும் இல்லாததால் ஏமாற்றத்துடன் திரும்பினர்.
பின்னர் முதல்வர் ரங்கசாமியை சட்டசபையில் புஸ்ஸி ஆனந்த் சந்தித்து பேசிய நிலையில், தவெக கூட்டத்துக்கு தலைமை செயலர், காவல்துறை உயர் அதிகாரிகளுடன் ஆலோசித்து முடிவெடுப்பதாக தெரிவித்தார். இதனால் விஜய்யின் ரோடு ஷோ திட்டமிட்டபடி 5ம்தேதி புதுச்சேரியில் நடைபெறுமா? என்ற கேள்வி எழுந்துள்ளது. இந்நிலையில், தவெக பொதுச்செயலாளர் புஸ்ஸி ஆனந்த் நேற்று மீண்டும் புதுச்சேரி ஐஜி அலுவலகம் வந்தார். அங்கு ஐஜி அஜித்குமார் சிங்லாவை சந்தித்து மனு கொடுத்து, விஜய் ரோடுஷோவுக்கு அனுமதி தருமாறு வலியுறுத்தினார்.
அதற்கு ஐஜி, டிஜிபி ஷாலினி சிங் மற்றும் டிஐஜி சத்தியசுந்தரம் இருவரும் ஊரில் இல்லை. அவர்கள் நாளை வந்தவுடன் வாருங்கள் என்று கூறி அனுப்பி வைத்தார். அதைத் தொடர்ந்து வெளியே வந்த புஸ்ஸி ஆனந்திடம் நிருபர்கள் கேட்டதற்கு நாளை (இன்று) வருமாறு அழைத்துள்ளனர் எனக் கூறி சென்றார். பின்னர், புதுவை சட்டசபையில் 2வது முறையாக நேற்று முதல்வர் ரங்கசாமியை புஸ்ஸி ஆனந்த் சந்தித்து பேசினார். அவரிடம் எந்த உறுதியும் அளிக்காத முதல்வர், நாளை பார்க்கலாம் என கூறியுள்ளார். இன்னும் 3 நாளே இருப்பதால் 5ம் தேதி விஜய் ரோடு ஷோவுக்கு காவல்துறை அனுமதி மறுக்கப்படும் என்று தகவல் வெளியாகி உள்ளது
