சென்னை: தமிழகம் முழுவதும் 702 ரயில் ஓட்டுநர் பணியிடங்கள் நிரப்பப்படாமல் காலியாக இருப்பது உறுதி செய்யப்பட்டுள்ளதாக தகவல் அறியும் உரிமைச் சட்டம் (RTI) அதிர்ச்சி தகவல் வெளியிட்டுள்ளது. இது குறித்து வெளியிடப்பட்டுள்ள செய்தியில், (RTI) கீழ் வெளியான ஆவணங்களின்படி, தமிழகம் முழுவதும் 702 ரயில் ஓட்டுநர் பணியிடங்கள் நிரப்பப்படாமல் காலியாக இருப்பது உறுதி செய்யப்பட்டுள்ளது. இது வெறும் எண்ணிக்கை அல்ல; பல்லாயிரக்கணக்கான பயணிகளின் பாதுகாப்பு தொடர்பான மிக முக்கியமான அலாரம் ஆகும்!
* ஓய்வில்லாத பயணங்கள்: ஊழியர்களுக்குப் பெரும் சவால்! ரயில்வேயில் ஆயிரக்கணக்கானோர் ஓய்வு பெற்றும், புதிய ஊழியர்கள் நியமிக்கப்படாததாலும், தற்போது பணியில் இருக்கும் ரயில் ஓட்டுநர்களுக்கு கடும் வேலைப்பளுவும், மன அழுத்தமும் ஏற்பட்டுள்ளதாகத் தகவல்கள் தெரிவிக்கின்றன.
*சோர்வு (Fatigue): நீண்ட தூரப் பயணங்களிலும், இரவு நேரச் சேவைகளிலும் ஓட்டுநர்கள் சோர்வுடனும், போதிய ஓய்வு இல்லாமலும் பணியாற்ற வேண்டிய கட்டாயத்துக்குத் தள்ளப்பட்டுள்ளனர்.
*பாதுகாப்புக் குறைவு: மன அழுத்தம் மற்றும் சோர்வுடன் இயக்கப்படும் ரயில்கள், எப்போது வேண்டுமானாலும் எதிர்பாராத விபத்துகளைச் சந்திக்க நேரிடலாம். இது பயணிகள் பாதுகாப்பில் உள்ள மிகப்பெரிய துளை.
*கூடுதல் சேவை முடக்கம்: முக்கியமாக, பண்டிகை காலங்கள் உட்பட அதிக தேவை உள்ள நேரங்களில், ஓட்டுநர்கள் பற்றாக்குறை காரணமாக கூடுதல் சிறப்பு ரயில்களை இயக்க முடியாத நிலை ஏற்படுகிறது. இதனால் தென் மாவட்ட மக்களின் நீண்ட கால ரயில் தேவைகள் பாதிக்கப்படுகின்றன.
விரைந்து நிரப்புங்கள்!
உடனடியாக இந்த 702 காலிப் பணியிடங்களையும் நிரப்ப வேண்டியது காலத்தின் கட்டாயம் என்று ரயில் பயணிகள் சங்கங்கள் வலியுறுத்தியுள்ளன. சோர்வுற்ற ஓட்டுநர்களை நம்பிப் பயணிப்பதை விட, புதிய நியமனங்களை விரைவுபடுத்துவதன் மூலமே ரயில்வே துறையால் “பாதுகாப்பை” உறுதி செய்ய முடியும்! விரைந்து செயல்பட வேண்டிய பொறுப்பு ரயில்வே நிர்வாகத்திற்கே உள்ளது. இவ்வாறு தெரிவிக்கப்பட்டுள்ளது.
