சிறுபான்மை குழந்தைகளின் கல்வி செலவு ஏற்பு ஆந்திர முதல்வர் அறிவிப்பு வரவேற்கத்தக்கது: இந்திய ஹஜ் அசோசியேஷன் அறிக்கை

சென்னை: இந்திய ஹஜ் அசோசியேஷன் தலைவர் பிரசிடெண்ட் அபூபக்கர் நேற்று வெளியிட்ட அறிக்கை: ஆந்திராவை பொறுத்தமட்டில் இடைநிலை கல்வி வரையிலும் பயிலக் கூடிய சிறுபான்மை சமூகத்தின் பெண்களுக்கு இடைநிலைக்கல்வி வரையிலும் இலவசக் கல்வி வழங்க அம்மாநில முதல்வர் சந்திரபாபு நாயுடு முடிவு செய்திருப்பது வரவேற்கத்தக்கது. எனவே இடைவெளி இல்லாமல் கல்வியை அனைவரும் தொடர்வதற்கு மிகப்பெரிய வாய்ப்பாக அமையும். இதனால் அந்த குழந்தைகளின் தலையெழுத்து மட்டுமல்லாது அவர்களின் வருங்கால சந்ததியினரின் வாழ்வையே மாற்றும் வகையில் இந்த திட்டம் அமைந்திருப்பது மகிழ்ச்சி அளிக்கிறது. மேலும், மெக்காவுக்கு புனித ஹஜ் பயணம் மேற்கொள்ளும் பயணிகளுக்கு ஒரு லட்சம் ரூபாய் அரசின் சார்பில் மானியம் வழங்கப்படும் என்பதும் இஸ்லாமியர்கள் மத்தியில் வரவேற்பை பெற்றுள்ளது. அதுமட்டுமல்லாது ஆந்திராவில் ஹஜ் இல்லம் கட்டுவதற்கு முடிவு செய்திருப்பதும் வரவேற்கத்தக்கது. இவ்வாறு கூறப்பட்டுள்ளது.