- ஆறுமுகநேரி
- அரவிந்த்
- திருமுருகன்பூண்டி ரோட்டரி சங்கம்
- அவிநாசி ரோடு, திருப்பூர்
- திருச்செந்தூர் கோயில்
- திருப்பூர்
ஆறுமுகநேரி: திருப்பூர் அவிநாசி ரோடு திருமுருகன்பூண்டி ரோட்டரி கிளப்பைச் சேர்ந்தவர் அரவிந்த்(25). இவர் தனது உறவினர் உட்பட நண்பர்களுடன் நேற்று இரவு திருப்பூரில் இருந்து திருச்செந்தூர் கோவிலுக்கு தனது நண்பர் காரில் வந்துள்ளனர். இதில் 2 சிறுவர்கள் உட்பட 10 பேர் வந்தனர். காரை அரவிந்த் ஓட்டி வந்தார். இன்று(ஞாயிறு) அதிகாலை காலை 2.30 மணியளவில் கார், தூத்துக்குடி- திருச்செந்தூர் சாலை ஆறுமுகநேரியில் வந்து கொண்டிருந்தது. அப்போது காரை ஓட்டி வந்தவர் தூங்கிய நிலையில் கார் கட்டுப்பாட்டை இழந்தது.
இதனால் சாலையில் எதிர்புறம் உள்ள ஆறுமுகநேரி வார சந்தையை அடுத்த ஆடியோ கடையின் படிக்கட்டில் ஏறி தொடர்ந்து கோழி கடை ஷட்டர் பூட்டை உடைத்து அடுத்துள்ள ஓட்டலுக்குள் புகுந்தது. இதில் ஹோட்டல் சுவர் மற்றும் அடுப்புகள் சேதமடைந்தது. மேலும் ஓட்டல் அருகில் உள்ள வாழை கமிஷன் மண்டி கடையின் சுவரும் சேதம் அடைந்தது. காரில் வந்தவர்களில் 5வயது சிறுவனுக்கு கை முறிவு உட்பட 4 பேருக்கு காயம் ஏற்பட்டது.
விபத்தை தொடர்ந்து இரவு ரோந்து பணியில் ஈடுபட்டிருந்த ஆறுமுகநேரி போலீசார், விபத்தில் காயம் அடைந்தவர்களை உடனடியாக மீட்டு திருச்செந்தூர் தனியார் மருத்துவமனைக்கு அனுப்பி வைத்தனர். அங்கு அவர்களுக்கு சிகிச்சை அளிக்கப்பட்டு வருகிறது. போலீசார் வழக்கு பதிந்து விசாரணை நடத்தி வருகின்றனர். தூத்துக்குடி- திருச்செந்தூர் சாலையில் பழைய காயல், ஆத்தூர், ஆறுமுகநேரி உட்பட்ட பகுதியில் நள்ளிரவு மற்றும் அதிகாலை இதுபோன்ற விபத்துக்கள் நடைபெற்று வருவது வழக்கமாக உள்ளது.
The post ஆறுமுகநேரியில் பரபரப்பு; கட்டுப்பாட்டை இழந்து ஓட்டலுக்குள் புகுந்த கார்: சிறுவன் உட்பட 4 பேர் காயம் appeared first on Dinakaran.
