சபரிமலையில் இன்றும், நாளையும் கனமழை எச்சரிக்கை

திருவனந்தபுரம்: சபரிமலை ஐயப்பன் கோயிலில் இம்முறை பக்தர்கள் வருகை அதிகமாக உள்ளது. கடந்த 11 நாளில் 7.50 லட்சத்திற்கும் அதிகமான பக்தர்கள் தரிசனம் செய்துள்ளனர். கடந்த வருடம் இதே நாட்களில் ஐந்தரை லட்சத்திற்கும் குறைவான பக்தர்களே வந்திருந்தனர். பக்தர்களின் வருகை அதிகரித்துள்ளதால் இவ்வருடம் சபரிமலை கோயில் வருமானமும் கூடியுள்ளது. கடந்த வருடத்தை விட இவ்வருடம் ரூ.14.50 கோடிக்கு மேல் கூடுதல் வருமானம் கிடைத்துள்ளது. நேற்றும் சபரிமலையில் பக்தர்கள் வருகை அதிகமாக இருந்தது.

இதற்கிடையே நேற்று சபரிமலையில் இரண்டாவது போலீஸ் பிரிவினர் பொறுப்பேற்றனர். இந்தப் பிரிவில் ஒரு எஸ்பி தலைமையில் 8 டிஎஸ்பிக்கள், 27 இன்ஸ்பெக்டர்கள், 90 சப் இன்ஸ்பெக்டர்கள் உள்பட 1500 போலீசார் உள்ளனர்.
இதில் ஒரு டிஎஸ்பி, 2 இன்ஸ்பெக்டர்கள், 12 சப் இன்ஸ்பெக்டர்கள் மற்றும் 155 காவலர்கள் அடங்கிய நுண்ணறிவுத் துறை மற்றும் வெடிகுண்டு பிரிவு போலீசாரும் உள்ளனர். இதற்கிடையே சபரிமலையில் இன்றும், நாளையும் இடி, மின்னலுடன் பலத்த மழை பெய்யும் என்று வானிலை ஆய்வு மையம் அறிவித்துள்ளது. சன்னிதானம், பம்பை நிலக்கல் ஆகிய இடங்களில் 24 மணி நேரத்தில் 11 சென்டிமீட்டர் வரை மழை பெய்யக்கூடும் என்று வானிலை ஆய்வு மையம் அறிவித்துள்ளது.

The post சபரிமலையில் இன்றும், நாளையும் கனமழை எச்சரிக்கை appeared first on Dinakaran.