காஞ்சிபுரம் மாவட்டத்தில் நாளை நடைபெறவுள்ள கலை போட்டிகளில் பங்கேற்க மாணவ, மாணவிகளுக்கு அழைப்பு

காஞ்சிபுரம்: காஞ்சிபுரத்தில் கலை பண்பாட்டுத்துறை சார்பில் நாளை நடைபெறவுள்ள, கலைப்போட்டிகளில் பங்கேற்ற மாணவ, மாணவிகளுக்கு அழைப்பு விடுக்கப்பட்டுள்ளது. காஞ்சிபுரம் மாவட்டத்தில், கலை பண்பாட்டுத்துறை, தமிழ்நாடு அரசு சவகர் சிறுவர் மன்றம் ஆகியவை மாணவ- மாணவிகளின் கலைத்திறனை ஊக்குவிக்கும் வகையில் 5-8, 9-12, 13-16 வயது வகை சிறார்களுக்கிடையே குரலிசை, பரதநாட்டியம், நாட்டுப்புற நடனம் மற்றும் ஓவியம் ஆகிய நான்கு கலைப்பிரிவுகளில் மாவட்ட அளவில் கலைப்போட்டிகள் நடத்தப்படுகிறது.

இப்போட்டிகளில், முதல் பரிசு பெற்ற மாணவர்களுக்கு மாநில அளவிலான போட்டிகள் நடத்தி, அதில் வெற்றிபெறுகின்ற மாணவ – மாணவிகளுக்கு அரசின் சார்பில் பாராட்டு தொகை மற்றும் சான்றிதழ் வழங்க நிதி ஒப்பளிப்பு செய்து அரசு ஆணையிட்டுள்ளது. அதன்படி, காஞ்சிபுரம் மாவட்ட அளவிலான போட்டிகள், காஞ்சிபுரம், ஓரிக்கை அஞ்சல், சதாவரம், (அரசு காதுகேளாதோர் பள்ளி அருகில்), மாவட்ட அரசு இசைப்பள்ளியில் நாளை (24.11.2024 – ஞாயிற்றுக்கிழமை) காலை 9 மணி முதல் 1 மணி வரை நடைபெறவுள்ளது.

இதில், குரலிசை போட்டியில் முறையாக இசை பயிலும் சிறார்கள் பங்குபெறலாம். தமிழில் அமைந்த இசை வடிவங்கள் பாட வேண்டும். பரதநாட்டியம் மற்றும் நாட்டுப்புற நடன போட்டியில் அதிகபட்சம் 4 நிமிடங்கள் ஆட அனுமதிக்கப்படுவார்கள். இப்போட்டியில், சினிமா பாடல்களுக்கான நடனம் மற்றும் குழு நடனம் அனுமதியில்லை. நாட்டுப்புற நடனப்போட்டியில் நமது பாரம்பரிய கரகம், ஒயில், காவடி, தப்பாட்டம் போன்ற நடனங்கள் மட்டும் இடம்பெற வேண்டும்.

ஓவிய போட்டிக்கு ஓவியத்தாள், வண்ணங்கள் தூரிகைகள் உட்பட தங்களுக்கு தேவையானவற்றை போட்டியாளர்களே கொண்டு வருதல் வேண்டும். ஓவிய தலைப்புகள் போட்டி தொடங்கும் முன்னர் அறிவிக்கப்படும். போட்டியாளர்கள் ஆதார் அட்டை நகல் கண்டிப்பாக கொண்டுவர வேண்டும். மேலும், விவரம் வேண்டுவோர் மண்டல உதவி இயக்குநர், கலை பண்பாட்டுத்துறை, சதாவரம், ஓரிக்கை அஞ்சல், சின்ன காஞ்சிபுரம் 631 502 முகவரியிலும், தொலைபேசி எண்: 044 – 2726 9148 அல்லது 98941 95455 என்ற எண்ணில் தொடர்பு கொள்ளலாம். இவ்வாய்ப்பினை கலைத்திறன் மிக்க காஞ்சிபுரம் மாவட்ட மாணவ, மாணவியர்கள் பயன்படுத்திக்கொள்ளலாம்.

The post காஞ்சிபுரம் மாவட்டத்தில் நாளை நடைபெறவுள்ள கலை போட்டிகளில் பங்கேற்க மாணவ, மாணவிகளுக்கு அழைப்பு appeared first on Dinakaran.