தேன்கனிக்கோட்டை அருகே இன்று அதிகாலை கார் மீது டிப்பர் லாரி மோதி ஆண் குழந்தை, பெண் பலி

தேன்கனிக்கோட்டை: தேன்கனிக்கோட்டை அருகே இன்று காலை கார் மீது லாரி மோதியதில் காரில் பயணித்த ஒன்றரை வயது குழந்தை மற்றும் பெண் உயிரிழந்தனர். மேலும் படுகாயமடைந்த 3பேருக்கு தீவிர சிகிச்சை அளிக்கப்பட்டு வருகிறது. கிருஷ்ணகிரி மாவட்டம் தேன்கனிக்கோட்டை அருகே உள்ள ஜல்லி கிரசரில் இருந்து எம்.சாண்ட் லோடு ஏற்றி கொண்டு இன்று அதிகாலை 5மணியளவில் தேன்கனிக்கோட்டை- ஓசூர் சாலையில் டிப்பர் லாரி சென்று கொண்டிருந்தது.

பி.செட்டிப்பள்ளி கிராம பஸ் நிறுத்தம் அருகே லாரி சென்றபோது ஓட்டுனரின் கட்டுப்பாட்டை இழந்து சாலையின் இடது ஓரமாக இருந்த புங்கமரத்தில் லாரி மோதியது. அப்போது ஓட்டுனர் லாரியை வலதுபுறமாக திருப்பியுள்ளார். அந்தநேரத்தில் அவ்வழியாக ஓசூரிலிருந்து தேன்கனிக்கோட்டை நோக்கி சென்ற கார் மீது லாரி பயங்கரமாக மோதியது. இதில் காரின் முன்பகுதி அப்பளம் போல் நொறுங்கியது. இதனிடையே லாரியை அங்கேயே நிறுத்திவிட்டு டிரைவர் தப்பியோடிவிட்டார்.

இந்நிலையில் காரில் இருந்த குழந்தை உள்பட 5 பேர் இடிபாடுகளில் சிக்கி சத்தம் போட்டனர். அவ்வழியாக சென்றவர்கள் இதுபற்றி உடனடியாக கெலமங்கலம் போலீசாருக்கு தகவல் தெரிவித்தனர். அதன்பேரில் சம்பவ இடம் விரைந்து வந்த போலீசார் மற்றும் கிராம மக்கள்உதவியுடன் இடிபாடுகளில் சிக்கியிருந்தவர்களை மீட்கும் பணியில் ஈடுபட்டனர். அப்போது ஒன்றரை வயது ஆண் குழந்தை மற்றும் பெண் ஒருவர் சம்பவ இடத்திலேயே உயிரிழந்திருப்பது தெரிந்தது. மேலும் காரில் இருந்தவர்களில் படுகாயமடைந்த மற்ற 3 பேரையும் போலீசார் மீட்டு ஆம்புலன்ஸ் மூலம் ஓசூர் அரசு மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. உயிரிழந்த குழந்தை மற்றும் பெண்ணின் உடல் பிரேத பரிசோதனைக்காக தேன்கனிக்கோட்டை அரசு மருத்துவமனைக்கு அனுப்பி வைக்கப்பட்டது.

தொடர்ந்து இதுபற்றி போலீசார் விசாரித்தனர். அதில், புதுக்கோட்டை மாவட்டம் ஆழங்குடியை சேர்ந்த கணேசன் மகன் நடராஜ்(33), இவரது மனைவி அபிராமி(25), இவர்களது ஒன்றரை வயது மகன் சோம்குகன், உறவினர் சீனிவாசன் மனைவி கவிதா (43), செல்வநாயகம் மகன் பிரபாகரன்(24) ஆகிய 5பேர் காரில் பயணித்திருப்பதும் ,இவர்களில் கவிதா மற்றும் ஒன்றரை வயது ஆண் குழந்தை மோகன்குகன் ஆகியோர் சம்பவ இடத்திலேயே உயிரிழந்திருப்பதும் தெரிந்தது.

மேலும் இவர்கள் ஓசூரில் இருந்து தேன்கனிக்கோட்டை வழியாக ஒகேனக்கல்லுக்கு சுற்றுலா சென்றபோது இந்த விபத்து நடந்துள்ளது. இந்த விபத்தால் அந்த பகுதியில் சிறிது நேரம் போக்குவரத்து பாதிப்பு ஏற்பட்டது. மேலும் விபத்துபற்றி போலீசார் வழக்குப்பதிவு செய்து தப்பிய டிப்பர் லாரி டிரைவர் குறித்தும் விசாரணை நடத்தி வருகின்றனர்.

The post தேன்கனிக்கோட்டை அருகே இன்று அதிகாலை கார் மீது டிப்பர் லாரி மோதி ஆண் குழந்தை, பெண் பலி appeared first on Dinakaran.