துளித்துளியாய்….

ஆண் குழந்தைக்கு தந்தையான ரோகித்

இந்திய கிரிக்கெட் அணி கேப்டன் ரோகித் சர்மா – ரிதிகா சஜ்தே தம்பதிக்கு, நேற்று அழகான ஆண் குழந்தை பிறந்தது. இந்திய கிரிக்கெட் அணி, ஆஸ்திரேலியாவுக்கு சுற்றுப்பயணம் சென்றுள்ளது. அங்கு, கவாஸ்கர் – பார்டர் கோப்பைக்கான போட்டிகளில் இந்தியா – ஆஸி அணிகள் மோதவுள்ளன. இருப்பினும், தன் மனைவிக்கு குழந்தை பிறக்கும் தேதி குறுக்கிட்டதால், ஆஸி பயணத்தை ஒத்தி வைத்திருந்தார் ரோகித். தற்போது குழந்தை பிறந்துள்ளதை அடுத்து, ஆஸி.யில் பெர்த் நகரில் நடக்கவுள்ள முதல் போட்டியில் ரோகித் பங்கேற்க மாட்டார் எனத் தெரிகிறது.

குத்துச் சண்டையில் இந்திய வீரர் வெற்றி

அமெரிக்காவின் டெக்சாஸ் மாகாணத்தில் நேற்று நடந்த, சூப்பர் மிடில் வெயிட் நான் டைட்டில் குத்துச் சண்டை போட்டியில், பிரேசில் வீரர் விண்டர்சன் நியுன்சை இந்திய வீரர் நீரஜ் கோயத் வென்றார். 6 ரவுண்டுகள் நடந்த இந்த போட்டியில் நடுவர்களின் ஒருமித்த முடிவின்படி, நீரஜ் வெற்றி பெற்றதாக அறிவிக்கப்பட்டது. ஏடி அண்ட் டி ஸ்டேடியத்தில், குத்துச் சண்டை ஜாம்பவான் மைக் டைசன் – ஜேக் பால் இடையிலான போட்டி நடப்பதற்கு முன், இந்த போட்டி நடந்தது.

டாடா ஸ்டீல் செஸ் கார்ல்சன் சாம்பியன்

மேற்கு வங்க தலைநகர் கொல்கத்தாவில் நடந்த, டாடா ஸ்டீல் ரேபிட் செஸ் போட்டியில், நார்வே நாட்டைச் சேர்ந்த உலக செஸ் சாம்பியன் மேக்னஸ் கார்ல்சன், 9 போட்டிகளில் 6ல் வென்று, 7.5 புள்ளிகளுடன் சாம்பியன் பட்டம் வென்றார். இரண்டாம் இடம் பிடித்த இந்தியாவின் பிரக்ஞானந்தாவை விட, 2 புள்ளிகள் அதிகமாக கார்ல்சன் பெற்றிருந்தார். பிரக்ஞானந்தாவுடன் மோதிய முதல் போட்டியும், கடைசி போட்டியும் சிரமமாக இருந்ததாக, கார்ல்சன் கூறினார்.

ரசிகை முகத்தை தாக்கிய சஞ்சு சாம்சன் சிக்சர்

தென் ஆப்ரிக்காவின் ஜோகன்னஸ்பர்க் நகரில் நேற்று முன்தினம் நடந்த, தென் ஆப்ரிக்கா அணிக்கு எதிரான 4வது டி20 போட்டியில் அபாரமாக ஆடிய இந்திய வீரர் சஞ்சு சாம்சன் சதமடித்து மிரட்டினார். போட்டியின் 10வது ஓவரை, தென் ஆப்ரிக்காவின் டிரிஸ்டன் ஸ்டப்ஸ் வீசியபோது, ஆக்ரோஷமாக ஆடிய சஞ்சு சாம்சன் விளாசிய பந்து பார்வையாளர் அரங்கில் முன் வரிசையில் அமர்ந்திருந்த ஒரு ரசிகையின் முகத்தை பதம் பார்த்தது. இதனால் வலியில் அலறித் துடித்த அவருக்கு முதல் உதவி சிகிச்சை அளிக்கப்பட்டது. ஐஸ் கட்டி ஒத்தடமும் அளிக்கப்பட்டது.

The post துளித்துளியாய்…. appeared first on Dinakaran.