விருதுநகர், நவ.13: விருதுநகர் மாவட்ட நிர்வாகம் வெளியிட்டுள்ள செய்திக்குறிப்பு வருமாறு: விருதுநகர் மாவட்ட வேலைவாய்ப்பு அலுவலகம் வாயிலாக தனியார்துறை வேலைவாய்ப்பு முகாம் நடத்தப்படவுள்ளது. அதன்படி படித்த வேலை தேடும் இளைஞர்களுக்காக நாளை காலை 10 மணி முதல் 02 மணி வரை சிவகாசி மௌலானா அபுல்கலாம் ஆசாத் தொழிற்பயிற்சி நிலையத்தில் நடைபெறுகிறது.
இதில், 20க்கும் மேற்பட்ட பிரபல முன்னணி நிறுவனங்கள் கலந்து கொள்கின்றன. 8ம் வகுப்பு தேர்ச்சி முதல் பட்டப்படிப்பு, ஐ.வு.ஐ.டிப்ளமோ மற்றும் பொறியியல் படிப்பு ஆகிய கல்வித் தகுதி உடைய பணியாளர்களை தெரிவு செய்யவுள்ளார்கள். இந்த அரிய வாய்ப்பினை பயன்படுத்த விரும்பும் வேலைநாடுநர்கள் அன்றைய தினம் வேலைவாய்ப்பு முகாமில் கலந்து கொள்வதற்கு முன்பாக www.tnprivatejobs.tn.gov.in என்ற இணையதளத்தில் தங்களது சுய விவரங்களை பதிவு செய்ய வேண்டும்.
மேலும், நேரில் அனைத்து கல்விச்சான்றிதழ், ஆதார் அட்டை நகல் ஆகியவற்றுடன் கலந்து கொள்ளுமாறு கேட்டுக்கொள்ளப்படுகிறது. மேலும் இச்சேவையானது முற்றிலும் கட்டணமில்லா சேவையாகும். இம்முகாமில் கலந்து கொள்ள விரும்பும் தனியார் துறை நிறுவனங்கள், மாவட்ட வேலைவாய்ப்பு அலுவலரை தொடர்பு கொள்ளலாம். தனியார் வேலைவாய்ப்பு முகாம் மூலம் பணி நியமனம் பெற்றவர்களது வேலைவாய்ப்பு அலுவலக பதிவு மூப்பு எவ்விதத்திலும் பாதிக்கப்படாது. இவ்வாறு தெரிவிக்கப்பட்டுள்ளது.
The post நாளை தனியார் துறை வேலைவாய்ப்பு முகாம் appeared first on Dinakaran.
